مانڈویہ نے ‘کھیلو بھارت کانکلیو’ میں اولمپکس 2036 کے لیے میڈل کی حکمت عملی کا خاکہ پیش کیا

نئی دہلی// مرکزی وزیر کھیل ڈاکٹر منسکھ مانڈویہ نے آج سمر اولمپکس 2036 اور پیرالمپکس میں سرفہرست 10 ممالک میں شامل ہونے کے لیے ہندوستان کی میڈل حکمت عملی کا خاکہ پیش کیا۔
ڈاکٹر مانڈویہ نے آج یہاں منعقد ‘کھیلو بھارت کانکلیو’ میں نیشنل اسپورٹس فیڈریشنز، انڈین پیرا اولمپک کمیٹی (پی سی آئی)، انڈین اولمپک ایسوسی ایشن (آئی اواے)، اداروں، اعلیٰ کارپوریٹ گھرانوں اور ہندوستانی کھیل انتظامیہ کے اہم لوگوں کے نمائندوں کے ساتھ ایک روزہ غورخوض سیشن میں حصہ لیا۔ اس کا مقصد 2047 تک ہندوستان کو ایک عالمی طاقت بنانا ہے۔
اس انٹرایکٹو کانکلیو میں کھیلو بھارت پالیسی 2025 (اسپورٹس پالیسی) میں شامل کئی اہم ستونوں پر تبادلہ خیال کیا گیا۔ گڈ گورننس کی اہمیت اور 21 جولائی سے شروع ہونے والے پارلیمنٹ کے مانسون اجلاس میں پیش کیے جانے والے آئندہ بل پر اہم بات چیت کی گئی۔
اس موقع پر ڈاکٹر مانڈویہ نے کہا، "کھیل ایک عوامی تحریک ہے، ہم اہداف کا تعین کر سکتے ہیں اور انہیں تب ہی حاصل کر سکتے ہیں جب ہم سب مل کر کام کریں گے۔ ہمارے وزیر اعظم مودی جی ہمیشہ کھیلوں کے معاملے میں متحد طاقت پر یقین رکھتے ہیں اور ہمیں اپنی انا کو چھوڑنا ہوگا، جامع منصوبہ بندی پر توجہ مرکوز کرتے ہوئے منصوبوں کو بامعنی نتائج میں تبدیل کرنا ہوگا۔”
یواین آئی۔الف الف