سرینگر//
نیشنل کانفرنس کے ترجمان اعلیٰ اور رکن اسمبلی تنویر صادق کا کہنا ہے کہ ان کی پارٹی۱۳جولائی کی سرکاری چھٹی کو بہت جلد بحال کرائے گی۔
صادق نے کہا کہ نیشنل کانفرنس نے ۱۳جولائی کے شہیدوں کو ہمیشہ خراج عقیدت پیش کیا ہے اور ہمیشہ کرتی رہے گی۔
ترجمان اعلیٰ نے ان باتوں کا اظہار جمعہ کے روز مادر مہربان بیگم اکبر جہاں عبداللہ کی ۲۵ویں برسی کے موقع پر نامہ نگاروں کے ساتھ بات کرنے کے دوران کیا۔
صادق نے کہا’’آج ہم مادر مہربان بیگم اکبر جہان کو یاد کر رہے ہیں جنہوں نے ہزاروں خواتین کو با اختیار بنایا اور ان کیلئے مواقع فراہم کئے‘‘۔
۱۳جولائی کے بارے میں پوچھے جانے پر ان کا کہنا تھا’’نیشنل کانفرنس نے ۱۳جولائی کے شہیدوں کو ہمیشہ خراج عقیدت پیش کیا ہے اور ہمیشہ کرتی رہے گی‘‘۔
صادق نے کہا’’پی ڈی پی کی جب بی جے پی کے ساتھ حکومت تھی تو ان کا ایک بھی کابینی وزیر اس دن مزار شہدا پر ۱۳جولائی کے شہیدوں کو خراج عقیدت پیش کرنے کے لئے نہیں جاتا تھا،یہاں تک کہ جب محبوبہ مفتی وزیر اعلیٰ تھیں تو وہ اپنی گاڑی پر جموں وکشمیر کا جھنڈا بھی نہیں لگاتی تھیں‘‘۔
این سی ترجمان نے کہا’’ہم۱۳جولائی کی چھٹی کو بہت جلد بحال کرائیں گے ۔افسوس ہے کہ جنہوں نے بی جے پی کے ساتھ ہاتھ ملایا اور جن کی وجہ سے۲۰۱۹ہوا ہم پر انگلیاں اٹھاتے ہیں‘‘۔
صادق نے کہا’’ہم نے اجازت طلب کی ہے جب حکمراں جماعت نے اجازت طلب کی ہے تو اس میں امن و قانون کا کوئی مسئلہ نہیں ہوسکتا ہے ۔‘‘
