سرینگر//
وزیر تعلیم سکینہ ایتو نے جمعہ کی شام کہا کہ کشمیر کے تمام سرکاری اور نجی اسکولوں میں پیر سے اوقات میں ترمیم ہونے کا امکان ہے۔
ایتو نے کہا کہ محکمہ موجودہ اوقات کار کے ساتھ چھوٹے اسکول جانے والے بچوں کو درپیش مشکلات کو مدنظر رکھتے ہوئے پیر سے اسکولوں کے اوقات میں تبدیلی کرنے کا منصوبہ بنا رہا ہے۔
وزیر تعلیم نے کہا کہ موسم میں نمایاں بہتری آئی ہے اور حالیہ بارش کے ساتھ درجہ حرارت میں بھی کمی آئی ہے۔انہوں نے کہا ’’ہم پیر سے وقت پر نظر ثانی کرنے کا منصوبہ بنا رہے ہیں‘‘۔
اس بات کا امکان ہے کہ پیر سے سرینگر میونسپل حدود میں آنے والے اسکولوں میں اوقات کار صبح۳۰:۸ سے دن کے ۳۰:۲ تک ہوں گے ۔
اس سے قبل ، اسکولوں کا وقت پرائمری سے بارہویں جماعت تک ، صبح۳۰:۷ بجے سے ۳۰:۱۱بجے تک جبکہ دیہی علاقوں کے لئے یہ بالترتیب صبح ۸ بجے سے دوپہر ۱۲ بجے تک طے کیا گیا تھا۔
والدین کی جانب سے موسم گرما کی تعطیلات میں توسیع کے مطالبے کے درمیان۱۵ دن کی موسم گرما کی تعطیلات کے بعد اسکول دوبارہ کھلنے کے بعد وقت طے کیا گیا تھا۔
ایتو نے کہا کہ آنے والے مہینوں میں سردیوں کے ابتدائی مہینوں کے موسمی حالات کو مدنظر رکھتے ہوئے اسکول کے وقت میں دوبارہ تبدیلی آئے گی۔
