رام بن میں سڑک حادثہ‘۳۵ یاتری زخمی ‘یاتریوں کی حفاظت کویقینی بنایا جائے :سنہا

جموں//
جموں کشمیر کے ضلع رام بن کے چندر کوٹ علاقے میں ہفتے کی صبح چار بسوں کے آپس میں ٹکرانے کے نتیجے میں کم سے کم۳۵یاتری معمولی زخمی ہوگئے ۔
ذرائع نے بتایا کہ رام بن کے چندر کوٹ میں ہفتے کی صبح قریب۸بجے پہلگام جارہے شری امرناتھ یاترا کے ایک قافلے کی ایک گاڑی کا بریک فیل ہونے سے چار گاڑیاں آپس میں ٹکرا گئیں جس کے نتیجے میں کم سے کم۳۵یاتری زخمی ہوگئے ۔
ضلع مجسٹریٹ رام بن کے’ایکس‘ہینڈل پر جانکاری فراہم کرتے ہوئے ایک پوسٹ میں کہا گیا’’شری امرناتھ جی یاترا کے پہلگام قافلے کی آخری گاڑی کا بریک فیل ہوگیا جس کے نتیجے میں چندر کوٹ لنگر سائٹ پر پھنسی ہوئی گاڑیوں کے درمیان ٹکر ہوگئی‘‘۔
مجسٹریٹ ں نے کہا کہ اس واقعے میں ۴گاڑیوں کو نقصان پہنچا اور۳۶یاتری معمولی زخمی ہوئے ۔
پوسٹ میں کہا گیا کہ وہاں موجود ضلع انتظامیہ کے اہلکاروں نے زخمیوں کو علاج و معالجے کے لئے فوری طور پر ضلع ہسپتال رام بن پہنچایا۔
انہوں نے کہا کہ واقعے کے متعلق اطلاع موصول ہوتے ہی ضلع مجسٹریٹ رام بن الیاس خان، ڈی آئی جی ڈی کے آر شری دھر پاٹل، ایس ایس پی رام بن کلبیر سنگھ اور اے ڈی سی ورن جیت سنگھ چرک فوری طور ہسپتال پہنچے اور وہاں زیرعلاج زخمیوں کی نگرانی کی، اور سی ایم او کو ان کے بہترین ممکنہ دیکھ بھال کو یقینی بنانے کی ہدایت کی۔
ان کا کہنا ہے کہ یاتریوں کو بعد میں دوسری گاڑیوں میں منتقل کرکے سفر پر روانہ کر دیا گیا۔دریں اثنا حکام نے لوگوں سے پریشان نہ ہونے کی اپیل کی ہے ۔انہوں نے کہا کہ پہلگام راستے سے شری امرناتھ یاترا بغیر خلل کے جاری ہے ۔
اس دوران لیفٹیننٹ گورنرمنوج سِنہانے حادثے کے حوالے سے کہا ہے’’بھگوان شیو کی کرپا سے تمام بھکت محفوظ ہیں۔ ہماری اوّلین ترجیح یاتریوں کی سلامتی ہے۔ متعلقہ اَفسران کو ہدایت دی گئی ہے کہ امرناتھ یاترا پر جانے والی گاڑیوں کے لئے جامع حفاظتی اَقدامات کو نافذ کریں، تمام اہم مقامات پر گاڑیوں کی حفاظتی جانچ کو یقینی بنایا جائے اور یاترا کے راستے میں خوراک اور اَدویات کی مسلسل فراہمی برقرار رکھی جائے‘‘۔
اِس سے قبل لیفٹیننٹ گورنر نے صوبائی کمشنر جموں رامیش کمار اور ضلع ترقیاتی کمشنر رام بن محمد اِلیاس خان سے بات کی اور زخمی یاتریوں کو تمام ضروری اِمداد فراہم کرنے کی ہدایت دی۔ اُنہوں نے سینئر اَفسران کو ہدایت دی کہ وہ چوکس رہیں اور یاتریوں کے پُرسکون اور محفوظ سفر کو یقینی بنانے کے لئے تمام لازمی اِنتظامات کریں۔ اُنہوں نے ضلعی اِنتظامیہ اور محکمہ صحت کی فوری اور مؤثر کارروائی کی بھی سراہنا کی۔
۔۔۔۔۔۔۔۔۔۔