اودھم پور میں بین ریاستی منشیات کا سرغنہ گرفتار:پولیس

جموں//
منشیات کے خلاف وسیع پیمانے پر جنگ کو جاری رکھتے ہوئے جموں و کشمیر پولیس نے ضلع اودھم پور میں بین ریاستی منشیات کے ایک سرغنہ کو گرفتار کیا ہے ۔
ایک پولیس ترجمان نے اپنے ایک بیان میں کہا کہ نارکو کرائم کے خلاف ایک بڑی کارروائی کو انجام دیتے ہوئے اودھم پور پولیس نے بین ریاستی منشیات کے ایک سرغنہ کو گرفتار کیا ہے ۔
گرفتار شدہ کی شناخت دھنی رام ولد فسر ساکن سلونی ضلع چھمبا ہماچل پردیش کے طور پر کی گئی ہے ۔انہوں نے کہا کہ ملزم کی گرفتاری پولیس اسٹیشن چننی میں این ڈی پی ایس ایکٹ کے تحت درج ایف آئی آر زیر نمبر۲۰۲۵/۴۵میں عمل میں لائی گئی۔
بیان میں کہا گیا کہ تکینکی، مالی اور زبانی شواہد کے بنیاد پر ملزم کو گذشتہ۱۰برسوں سے منشیات کی اسمگلنگ میں ملوث پایا گیا۔انہوں نے کہا کہ مذکرہ ملزم کے مجرمانہ طور طریقے کے پیش نظر این ڈی پی ایس کیس میں بی این ایس کے دفعہ ۱۱۱کو پہلی بار نافذ کیا گیا۔پولیس ترجمان نے بتایا کہ اودھم پور پولیس معاشرے سے منشیات کی بیخ کنی کیلئے پر عزم ہے ۔