امر ناتھ یاترا سے قبل جموں میں سی آر پی ایف کا سینیٹائزیشن آپریشن

جموں//
سالانہ امر ناتھ یاترا سے قبل پیرا ملٹری فورسز (سی آر پی ایف) نے بدھ کے روز جموں کے بھگوتی نگر بیس کیمپ اور اس کے گرد و نواح میں باریک بینی سے تلاشی لی جس دوران سراغ رساں کتوں کی بھی خدمات حاصل کی گئیں۔
سی آر پی ایف کے افسران کے مطابق، بیس کیمپ اور متصل علاقوں میں مشکوک اشیاء اور سرگرمیوں کی روک تھام کے لیے جدید آلات سے لیس دستوں نے تلاشی لی تاکہ یاترا سے قبل ہر ممکن خطرے کو ختم کیا جاسکے ۔
سالانہ امرناتھ یاترا کا آغاز۳جولائی سے ہوگا، جو دو روایتی راستوں ۴۸کلومیٹر طویل ننون،پہلگام (ضلع اننت ناگ) اور۱۴کلومیٹر مختصر مگر دشوار گزار بالہ تل (ضلع گاندربل) کے ذریعے انجام دی جائے گی۔ یاترا سے ایک روز قبل پہلا قافلہ بھگوتی نگر بیس کیمپ اور رام مندر جموں سے روانہ ہوگا۔
یاترا کے دوران لاکھوں عقیدت مند۳۸۸۰ میٹر کی بلندی پر واقع برف سے بنے قدرتی شیو لنگم کے درشن کرتے ہیں۔ گزشتہ سال۱۰ء۵لاکھ سے زائد یاتریوں نے امرناتھ گپھا میں حاضری دی تھی۔
حکام کے مطابق، موجودہ سیکورٹی صورتحال کے پیش نظر یاترا کے راستوں، بیس کیمپس، لنگر پوائنٹس اور قیام گاہوں پر سخت ترین حفاظتی انتظامات کیے جا رہے ہیں۔ ریاستی پولیس، سی آر پی ایف، بی ایس ایف، اور دیگر ایجنسیوں کی مشترکہ نگرانی جاری ہے تاکہ یاترا کے پرامن اور محفوظ انعقاد کو یقینی بنایا جا سکے ۔
عوام سے بھی اپیل کی گئی ہے کہ وہ مشکوک افراد یا اشیاء کے بارے میں فوری طور پر قریبی سیکورٹی اداروں کو اطلاع دیں۔