کنزر میں کمسن بچے کی پراسرار موت کا معمہ حل‘ نابالغ گرفتار

سرینگر//
جموں کشمیر پولیس نے شمالی کشمیر کے کنزر بارہمولہ علاقے میں ایک کمسن بچے کی پراسرار موت کے معمہ کو حل کر لیا ہے ۔
پولیس کے مطابق اس واقعے میں ملوث ایک۱۴سالہ لڑکے کو گرفتار کر لیا گیا ہے ، جب کہ دو دیگر افراد سے بھی تفتیش جاری ہے ۔
پولیس بیان کے مطابق۱۲ جون ۲۰۲۵کو کنزر تھانے کو اطلاع ملی کہ بانڈپورہ لالپورہ کا رہائشی ایک آٹھ سالہ بچہ (نام صیغہ راز میں) اپنے گھر کے قریب ایک کھیت میں بے ہوش حالت میں پایا گیا۔ اہل خانہ نے فوری طور پر بچے کو طبی امداد کیلئے جے وی سی اسپتال سرینگر منتقل کیا۔
واقعے کی سنگینی کے پیش نظر پولیس نے فوراً فرانزک سائنس لیبارٹری کی ٹیم کو جائے وقوعہ پر طلب کیا تاکہ سائنسی بنیادوں پر شواہد اکٹھے کیے جا سکیں۔ اس سلسلے میں ایک مقدمہ درج کر کے تفصیلی تحقیقات کا آغاز کیا گیا۔
پولیس کے مطابق تمام کوششوں کے باوجود معصوم بچہ اسپتال میں زخموں کی تاب نہ لاتے ہوئے آج صبح دم توڑ گیا۔ طبی اور قانونی ضابطے مکمل کرنے کے بعد لاش کو اہل خانہ کے سپرد کیا گیا۔
تحقیقات کے دوران ایک ۱۴سالہ لڑکے نے اس واقعے میں اپنے ملوث ہونے کا اعتراف کیا، جس کے بعد اسے جووینائل جسٹس ایکٹ کے تحت گرفتار کر کے متعلقہ مجاز عدالت میں پیش کرنے کی کارروائی شروع کی گئی ہے ۔
پولیس نے مزید بتایا کہ ملزم سے وابستہ دو دیگر افراد کو بھی پوچھ گچھ کے لیے حراست میں لیا گیا ہے ، اور واقعے سے متعلق مختلف پہلوؤں کی چھان بین جاری ہے ۔
جموں کشمیر پولیس نے عوام کو یقین دلایا ہے کہ اس معاملے کی پیشہ ورانہ، شفاف اور غیر جانبدارانہ تحقیقات کی جا رہی ہیں، اور تمام قانونی تقاضے پوری دیانت داری سے پورے کیے جا رہے ہیں۔