عوامی مسائل کا حل حکومت کی اولین ترجیح ہے :وزیر اعلیٰ

سرینگر//
جموں کشمیر کے وزیر اعلیٰ ‘عمر عبداللہ نے کہا ہے کہ حکومت ریاست کے عوام کو درپیش مسائل و مشکلات سے بخوبی واقف ہے اور ان کے ازالے کے لیے تمام تر حکومتی مشینری متحرک ہے ۔
عمرعبداللہ نے یقین دلایا کہ عوامی فلاح و بہبود حکومت کی اولین ترجیحات میں شامل ہے ۔عمر عبداللہ ہفتے کے روز نیشنل کانفرنس ہیڈکوارٹر پر پارٹی لیڈران، عہدیداران اور کارکنان کے ساتھ ایک تفصیلی اجلاس میں تبادلہ خیال کر رہے تھے ۔
اس موقع پر ملاقات کرنے والے وفود نے وزیر اعلیٰ کو مختلف علاقوں میں عوام کو درپیش بنیادی مسائل، ترقیاتی امور، اور دیگر مشکلات سے آگاہ کیا۔
وزیر اعلیٰ نے وفود کو یقین دہانی کرائی کہ حکومت تمام جائز عوامی مطالبات کو ترجیحی بنیادوں پر حل کرے گی اور ہر ممکن کوشش کی جائے گی کہ لوگوں کو سہولیات میسر ہوں۔ انہوں نے کہا’’ہمیں آپ کے مسائل کا مکمل ادراک ہے اور ان کا حل ہماری اولین ترجیح ہے ‘‘۔
عمر عبداللہ نے اس موقع پر تنظیمی معاملات اور پارٹی پروگراموں کے حوالے سے بھی مکمل تفصیلات حاصل کیں اور کارکنوں پر زور دیا کہ وہ نیشنل کانفرنس کی مضبوطی کے لیے مزید فعال کردار ادا کریں۔
وزیر اعلیٰ نے کہا’’نیشنل کانفرنس جموں و کشمیر اور لداخ کے عوام کی ترجمان جماعت ہے اور ہمیشہ عوام کو ہی طاقت کا سرچشمہ مانا ہے ۔ ہمیں عوامی مسائل کو اجاگر کرنے میں ہر وقت پیش پیش رہنا چاہیے‘‘ ۔
وزیر اعلیٰ نے پارٹی کارکنوں سے اپیل کی کہ وہ زمینی سطح پر عوام سے قریبی روابط قائم رکھیں اور ترقیاتی عمل کو مؤثر طریقے سے آگے بڑھانے میں حکومت کا ہاتھ بٹائیں۔