راجوری میں دہشت گردوں کی کمین گاہ سے اسلحہ و گولہ بارود برآمد

جموں//
جموں کشمیر کے ضلع راجوری کے تھنہ منڈی علاقے میں منگل کو سیکورٹی فورسز نے ایک مشترکہ تلاشی کارروائی کے دوران دہشت گردوں کی کمین گاہ سے۱۰؍انڈر بیرل گرینیڈ لانچر (یو بی جی ایل) سمیت دیگر قابلِ اعتراض اشیاء ضبط برآمد کرکے ضبط کیں ہیں۔
ذرائع کے مطابق یہ کارروائی پولیس اور فوج کے مشترکہ دستے نے دارہ براچھرا گاؤں میں انجام دی۔ تلاشی کے دوران نہ صرف اسلحہ برآمد کیا گیا بلکہ ایک خراب ایمونیشن باکس، کمبل، پلاسٹک ترپال، دو پیکٹ ادویات، کچھ برتن اور روزمرہ استعمال کی چیزیں بھی ضبط کی گئیں۔
حکام کا کہنا ہے کہ ضبط شدہ سامان سے ظاہر ہوتا ہے کہ اس جگہ کو ملی ٹینٹ تنظیموں کی جانب سے چھپنے یا عارضی قیام کے لیے استعمال کیا جا رہا تھا۔ انہوں نے کہا کہ علاقے میں تلاشی کارروائیاں جاری ہیں تاکہ ممکنہ دیگر ٹھکانوں یا مواد کا پتہ لگایا جا سکے ۔
قابل ذکر ہے کہ حالیہ دنوں میں راجوری اور پونچھ کے پہاڑی علاقوں میں دہشت گردوں کی نقل و حرکت سے متعلق انٹیلی جنس اطلاعات کے بعد فورسز کی جانب سے تلاشی آپریشنز میں تیزی لائی گئی ہے ۔