’وزیر اعظم مودی کے ہاتھوں ہی ریاست کا درجہ بحال ہو گا ‘

سرینگر//
جموں کشمیر کے وزیر اعلیٰ‘ عمر عبداللہ کا کہنا ہے کہ وزیر اعظم نریندر مودی کی قیادت میں ہی جموں کشمیر کا ریاستی درجہ بحال ہوگا۔
وزیر اعلیٰ نے جمعہ کے روز کٹرا میں وزیر اعظم نریندر مودی کی طرف چناب ریل پل کا افتتاح کرنے کے بعد لوگوں کے ایک اجتماع سے خطاب کرتے ہوئے کہا’’میری خوش قسمتی ہے کہ میں جموں کشمیر کے تمام ریلوے پروجیکٹوں میں وزیر اعظم کے ساتھ منسلک رہا ہوں پہلا، جب اننت ناگ ریلوے اسٹیشن کا افتتاح ہوا، دوسرا، جب بانہال ریلوے ٹنل کا افتتاح ہوا‘‘۔
ریاستی درجے کی بحالی کا مسئلہ اٹھاتے ہوئے انہوں نے مزاحیہ انداز میں کہا’’ایل جی منوج سنہا کو ایک جونیئر پوزیشن سے اپنے موجودہ عہدے پر ترقی دی گئی جبکہ مجھے ریاست کے وزیر اعلیٰ سے تنزلی کرکے یونین ٹریٹری کا وزیر اعلیٰ بنا دیا گیا‘‘۔
سال ۲۰۱۴میں اقتدار سنبھالنے کے بعد وزیر اعظم مودی کے کٹرا کے پہلے دورے کو یاد کرتے ہوئے وزیر اعلیٰ نے کہا’’یہ ایک اتفاق ہے کہ۲۰۱۴میں اس تقریب میں چار لوگ موجود تھے اور آج وہ چاروں ایک بار پھر اس اسٹیج پر آپ کے ساتھ بیٹھے ہیں‘‘۔
عمرعبداللہ نے کہا’’میں اس وقت ایک ریاست کا وزیر اعلیٰ تھا لیکن آج ایک یونین ٹریٹری کا وزیر اعلیٰ ہوں لیکن میں مان کے چل رہا ہوں اس کو درست ہونے میں اب زیادہ دیر نہیں لگے گی اور آپ ہی کے ہاتھوں دوبارہ جموںکشمیر کو ریاست کا درجہ حاصل ہو گا ‘‘۔
عمر عبداللہ نے سابق وزیر اعظم آنجہانی اٹل بہاری واجپئی کو جموں،بارہمولہ ریل پروجیکٹ کو قومی اہمیت کے پروجیکٹ کا درجہ دینے پر بھی خراج تحسین پیش کرتے ہوئے کہا’’یہ پروجیکٹ۸۴۔۱۹۸۳میں شروع کیا گیا تھا‘‘۔
وزیر اعلیٰ نے کہا’’میں نے میڈیا کو مذاق میں بتایا کہ جب یہ پروجیکٹ شروع ہوا تو میں آٹھویں جماعت کا طالب علم تھا۔ آج میں ۵۵سال کا ہوں، میرے بچے کالج سے فارغ التحصیل ہیں اور آخر کار یہ منصوبہ مکمل ہو گیا‘‘۔
عمرعبداللہ نے نئی ٹرین لائن کا خیرمقدم کرتے ہوئے کہا’’یہ خطے کے لیے ایک بڑا اعزاز ہے ، خاص طور پر بارش کی وجہ سے شاہراہوں میں رکاوٹوں کے دوران، جب بھی بارش ہوتی ہے اور ہائی وے بند ہو جاتی ہے ، تو ہوائی سفر کا کرایہ بڑھا جاتا ہے ،عام طور پر جن ٹکٹوں کی قیمت ۵ہزار روپے ہوتی ہے وہ یکایک ۲۰ہزار روپے تک پہنچ جاتی ہے لیکن اب اس ٹرین سے یہ استحصال کم ہو جائے گا، اور سفر آسان ہو جائے گا‘‘۔
عمر عبداللہ نے مقامی زراعت کے لیے ریلوے رابطے کے اقتصادی فوائد پر بھی روشنی ڈالی۔
وزیر اعلیٰ نے کہا’’ہمارے سیب، چیری اور دیگر پھل اب زیادہ مؤثر طریقے سے ملک بھر کی منڈیوں تک پہنچ سکتے ہیں اور مجھے امید ہے کہ آخر کار عالمی منڈیوں تک ان کی رسائی ہوگی‘‘۔
عمرعبداللہ نے جموں اور سرینگر رنگ روڈ، دہلی،امرتسر،کٹرا ایکسپریس وے ، جموں،سرینگر ہائی وے فور لیننگ پروجیکٹ اور جموں اور سری نگر دونوں ہوائی اڈوں کی توسیع کا حوالہ دیتے ہوئے بنیادی ڈھانچے پر مرکزی حکومت کے عزم کو تسلیم کرتے ہوئے کہا’’ہمارا پورا ارادہ اور پرعزم کوشش ہے کہ ان پروجیکٹوں کو تیزی سے مکمل کیا جائے اور آپ کے ‘وکیسٹ جموں کشمیر، وکسٹ بھارت’ کے نعرے کو پورا کیا جائے ‘‘۔
وزیر اعلیٰ نے وزیر اعظم نریندر مودی کا دلی شکریہ ادا کرتے ہوئے انہیں مبارکباد پیش کی اور کہا کہ جموں و کشمیر کے لوگ مزید جامع ترقی کے منتظر ہیں ۔