کشمیر کو ریل نیٹ ورک سے جوڑنے کا خواب وزیر اعظم مودی کے پختہ عزم سے ہی ممکن ہوا:اشونی ویشنو

جموں//
ریلوے وزیر اشونی ویشنو نے جموں و کشمیر کے لیے ریلوے رابطے کو ایک’‘تاریخی سنگ میل‘ قرار دیتے ہوئے کہا ہے کہ کشمیر کو ملک کے دیگر حصوں سے جوڑنے کا خواب وزیر اعظم نریندر مودی کی قیادت اور مسلسل محنت سے ہی ممکن ہوا ہے ۔
کٹرا میں عوامی جلسے سے خطاب کے دوران مرکزی ریلوے وزیر اشونی ویشنو نے کہا’’جموں،سرینگر،بارہ مولا ریلوے لائن کا خواب قوم نے کئی دہائیوں سے دیکھ رکھا تھا۔ قدرتی رکاوٹیں جیسے کہ بلند و بالا پہاڑ اور گہری وادیاں اس راہ میں بڑی چنوتیاں تھیں، لیکن ہم نے فطرت سے لڑنے کے بجائے اس کے ساتھ ہم آہنگ ہو کر پلوں اور سرنگوں کا ایسا جال بچھایا جس سے یہ خواب آج حقیقت میں بدل گیا‘‘۔
ویشنو نے مزید کہا کہ یہ سب کچھ وزیر اعظم مودی کے ’پختہ ارادے ‘تدبر اور ملک گیر نظریے کی بدولت ممکن ہوا ہے ۔
ریلوے وزیر نے کہا کہ یہ صرف ایک ریلوے لائن نہیں بلکہ قومی یکجہتی، علاقائی ہم آہنگی اور اقتصادی ترقی کی جانب ایک انقلابی قدم ہے ۔ آج بھارت کے تاج میں ایک اور نایاب جواہر جُڑ گیا ہے ۔
جموں،بارہمولہ ریلوے لائن پر گزشتہ دو دہائیوں سے کام جاری تھا، لیکن مشکل جغرافیائی حالات، شدید موسمی رکاوٹوں اور تکنیکی چنوتیوں کے باعث اس منصوبے کو مکمل ہونے میں طویل وقت لگا۔ حالیہ برسوں میں یو ٹی میں بڑھتے انفراسٹرکچر اقدامات کے بعد اس منصوبے کو تیزی ملی، اور اب سری نگر وادی کو ملک کے باقی حصوں سے ریلوے کے ذریعے جوڑنے والا خواب شرمندئہ تعبیر ہو چکا ہے ۔
ماہرین کا کہنا ہے کہ اس ریل رابطے سے کشمیر میں سیاحت، تجارت اور روزگار کے بے شمار مواقع پیدا ہوں گے ۔ ساتھ ہی یہ قدم خطے میں نقل و حمل کو آسان بنائے گا۔