صحافی فرنٹ لائن واریر ہیں، فٹنس ان کے لیے بھی اہم ہے: مانڈویا

نئی دہلی*//مرکزی وزیر کھیل منسکھ مانڈویا نے ‘سنڈے آن سائیکل پروگرام میں کہا کہ صحافی فرنٹ لائن واریر ہیں، ان کے لیے بھی فٹنس ضروری ہے۔
مرکزی وزیر کھیل ڈاکٹر منسکھ مانڈویا نے صحافیوں اور میڈیا برادری کے ارکان کے ساتھ آج یہاں جواہر لال نہرو اسٹیڈیم میں خراب موسم کے باوجود سائیکل چلائی۔ دہلی جرنلسٹ ایسوسی ایشن، دہلی اسپورٹس جرنلسٹس ایسوسی ایشن، کھلاڑیوں اور 300 سے زیادہ شہریوں نے اس چار کلو میٹر سائیکل ریلی میں حصہ لیا۔
اس موقع پر ڈاکٹر مانڈویانے کہاکہ "مجھے خوشی ہے کہ بارش کے باوجود سائیکل پر آج کا اتوار کامیاب رہا۔ ہمارے صحافی دوست پورے جوش و خروش کے ساتھ آئے اور یہ دیکھ کر واقعی خوشی ہوئی۔ صحافیوں کا شاذ و نادر ہی پرامن معمول ہوتا ہے، وہ دن رات کام کرتے ہیں۔ ہم ہر صبح جو سرخیاں پڑھتے ہیں وہ ان کی انتھک کوششوں کا نتیجہ ہے۔ رات بھر کام جاری رکھنا ان کے لیے ضروری ہے۔ اس لیے میں نے انہیں مدعو کیا۔”
راکیش تھپلیال، صدر، دہلی جرنلسٹس ایسوسی ایشن نے اظہار تشکر کرتے ہوئے کہاکہ "محترم وزیر کی طرف سے مدعو کیا جانا ایک شاندار تجربہ تھا۔ بارش اور رات گئے تک ہمارے کام کرنے کے باوجود بہت سارے صحافی آئے – اس سے ثابت ہوتا ہے کہ فٹنس مزیدار ہوسکتی ہے۔ سائیکل چلانے جیسی صرف ایک گھنٹہ کی سرگرمی صحت کو بہتر بنانے اور طبی اخراجات کو کم کرنے میں بہت مدد گار ہوسکتی ہے۔”
دہلی اسپورٹس جرنلسٹس ایسوسی ایشن کے صدر ابھیشیک ترپاٹھی نے کہا کہ سائیکل پر وزیر کے ساتھ شامل ہونے سے یہ حقیقت سامنے آئی کہ فٹنس کتنی اہم ہے، خاص طور پر میڈیا پروفیشنلز کے لیے جو ہمیشہ متحرک رہتے ہیں۔ سائیکل چلانا نہ صرف ہماری صحت بلکہ ماحول کے لیے بھی اچھا ہے۔