’دہشت گردی جاری رہی تو پاکستان کو تباہ کیا جائیگا ‘

آپریشن سندور کوئی عام فوجی آپریشن نہیں تھا‘یہ ہندوستان کی پالیسی، ارادوں اور فیصلہ کن صلاحیتوں کا سنگم تھا‘ جب ہماری بہنوں کا سندور چھین لیا گیا تو ہماری فوج دہشت گردوں کے گھروں میں گھس گئی اور انہیں کچل دیا
نئی دہلی//
وزیر اعظم نریندر مودی نے آج پاکستان کو سخت انتباہ دیتے ہوئے کہا کہ ہندوستان امن چاہتا ہے لیکن اگر وہ کسی دہشت گردی یا فوجی حماقت میں ملوث ہوتا ہے تو ہندوستان اس کا صفایا کرنے میں کوئی کسر نہیں چھوڑے گا۔
ایس ۴۰۰ میزائل دفاعی نظام کے پس منظر میں وزیر اعظم نریندر مودی نے آدم پور ایئر بیس سے پاکستان کو ایک سخت پیغام بھیجتے ہوئے کہا’’ نہ صرف آپ ہندوستان کی کسی بھی فوجی تنصیب کو نقصان پہنچانے میں ناکام رہے ہیں بلکہ اگر آپ کی سرزمین سے دہشت گردی جاری رہی تو آپ کو تباہ کردیا جائے گا‘‘۔
آپریشن سندورکے بعد سرحدوں پر فوجی کارروائی روکنے پر اتفاق رائے کے درمیان، وزیر اعظم نریندر مودی منگل کی صبح آدم پور ایئر فورس اسٹیشن پہنچے اور وہاں موجود فضائی اور دیگر فوجیوں سے بات چیت کی۔
پاکستان نے لڑاکا طیاروں اور ڈرونز کا استعمال کرتے ہوئے اس ایئر فورس سٹیشن پر ناکام حملے کی کوشش کی تھی۔
مودی نے ہندوستان کے فضائی دفاعی نظام ایس۴۰۰ کے سامنے فوجیوں سے خطاب کرتے ہوئے پاکستان کے اس جھوٹ کو بے نقاب کیا جس میں اس نے اس نظام کو تباہ کرنے کا دعویٰ کیا تھا۔
مودی نے بھارت ماتا کی جئے کے مسلسل نعروں کے درمیان فضائیہ کے جوانوں کی ستائش کرتے ہوئے کہا کہ ان کی بہادری اور شان کی داستان آپریشن سندور کی گونج اب پوری دنیا میں سنی جا رہی ہے۔ انہوں نے کہا کہ یہ نیا ہندوستان ہے، یہ ہندوستان امن چاہتا ہے لیکن اگر انسانیت پر حملہ ہوتا ہے تو یہ ہندوستان محاذ جنگ پر دشمن کو تباہ کرنا بھی جانتا ہے۔ انہوں نے کہا کہ آپریشن سندور کوئی عام فوجی آپریشن نہیں تھا۔ یہ ہندوستان کی پالیسی، ارادوں اور فیصلہ کن صلاحیتوں کا سنگم تھا۔
وزیر اعظم نے کہا کہ دہشت گردی کے خلاف ہندوستان کی لکشمن ریکھا بہت واضح ہے۔ اگر اب کوئی دہشت گرد حملہ ہوا تو ہندستان اس کا بھرپور جواب دے گا۔ انہوں نے کہا کہ ائراسٹرائک کے وقت تمام نے دیکھا اور آپریشن سندور اب ہندستان کا نیا معمول ہے، ہم نے تین اصول طے کیے ہیں، اگر ہندستان پر کوئی دہشت گرد حملہ ہوا تو ہم اپنے طریقے سے اور اپنی شرائط پر اور اپنے وقت پر جواب دیں گے، دوسری بات ہندستان نیوکلیئر بلیک میلنگ کو برداشت نہیں کرے گا۔ ہندستان دہشت گردی کی سرپرستی کرنے والی حکومت اور دہشت گردی کو الگ الگ نہیں دیکھتا اور اب دنیا بھی ہندستان کی اس نئی شکل کو دیکھتے ہوئے آگے بڑھے گی۔
مودی نے کہا کہ بھارت ماتا کی جئے صرف ایک نعرہ نہیں ہے، یہ ان سپاہیوں کا درد ہے جو ماں بھارتی کے لیے اپنی جان خطرے میں ڈال دیتے ہیں، یہ ہر اس شہری کی آواز ہے جو ملک کے لیے کچھ کرنا چاہتا ہے۔ یہ میدان اور مشن میں گونجتا ہے۔ انہوں نے کہا ’’جب ہمارے بہادر جئے کہتے ہیں تو دشمن کا دل کانپ جاتا ہے، جب فوج ایٹمی بلیک میلنگ کی ہوا نکال دیتی ہے اور ہندوستان کے ڈرون اور میزائل دشمن کے علاقے میں جاتے ہیں تو دشمن کوبھی بھارت ماتا کی جئے سنائی دیتی ہے‘‘۔
وزیر اعظم نے کہا کہ آپریشن سندور کوئی عام فوجی آپریشن نہیں تھا۔ یہ ہندوستان کی پالیسی، ارادوں اور فیصلہ کن صلاحیتوں کا سنگم تھا۔ انہوں نے کہا کہ یہ بدھ کی سرزمین ہے اور گرو گوبند سنگھ کی بھی سرزمین ہے۔ ’’مذہب قائم کرنے کے لیے ہتھیار اٹھانا ہماری روایت ہے، جب ہماری بہنوں کا سندور چھین لیا گیا تو ہماری فوج دہشت گردوں کے گھروں میں گھس گئی اور انہیں کچل دیا، جو لوگ بزدلوں کی طرح چھپ کر آئے تھے لیکن وہ بھول گئے کہ جسے انہوں نے للکارا ہے، وہ ہندوستانی فوج ہے، آپ نے انہیں سامنے سے حملہ کرکے مار ا ہے‘‘۔
انہوں نے کہا کہ سو سے زائد دہشت گردوں کی ہلاکت سے دہشت گردی کے آقا سمجھ گئے ہیں کہ ہندستان کی طرف آنکھ اٹھانے سے تباہی آئے گی۔
فضائیہ فوج کی تعریف کرتے ہوئے وزیر اعظم نے کہا کہ جب بھی ہندوستان کی اس بہادری کی بات ہوگی، جب بھی ہندوستان کی تاریخ کی بات ہوگی، آپ کے باب پر بھی بات ہوگی۔ انہوں نے کہا کہ ہیروز کی اس سرزمین سے وہ ایئر فورس، نیوی، آرمی اور بی ایس ایف کے ہیروز کو سلام کرتا ہوں۔
مودی نے فضائیہ کے جوانوں سے کہا کہ ان کی بہادری کی وجہ سے آپریشن سندور کی گونج ہر کونے سے سنائی دے رہی ہے۔ انہوں نے کہا’’پوری کارروائی کے دوران ہر ہندوستانی آپ کے ساتھ کھڑا رہا، ان کی دعائیں آپ کے ساتھ تھیں۔ ہر ملک کا باشندہ فوجیوں اور ان کے اہل خانہ کا شکر گزار اور مقروض ہے‘‘۔
وزیر اعظم نے پاکستان اور دہشت گردوں کو سخت پیغام دیا گیا کہ اگر بے گناہ لوگوں کی موت ہوتی ہے تو تباہی اور بڑے پیمانے پر تباہی ہو گی۔ انہوں نے کہا کہ جس پاکستانی فوج کے بھروسے دہشت گرد بیٹھے تھے ہندستانی افواج نے اس پاکستانی فوج کو شکست دی ہے۔ ’’ہماری افواج نے پاکستانی فوج کو بھی بتا دیا ہے کہ پاکستان میں کوئی ایسی ٹھکانہ نہیں جہاں دہشت گرد سکون کی سانس لے سکیں‘‘۔ان کاکہنا تھا ’’ہم گھر میں گھس کر انہیں ماریں گے اور انہیں بدلہ لینے کا موقع بھی نہیں دیں گے‘‘۔ انہوں نے کہا کہ پاکستان اپنے ڈرونز اور میزائلوں کے بارے میں سوچ کر کئی دن سو نہیں پائے گا۔
دیسی ہتھیاروں کی کامیابی کا ذکر کرتے ہوئے مودی نے مہارانا پرتاپ کے گھوڑے چیتک سے متعلق نظم کی سطروں کا حوالہ دیا اور کہا کہ یہ سطریں ہندوستان کے دیسی اور جدید ہتھیاروں پر بھی فٹ بیٹھتی ہیں۔ انہوں نے مسلح افواج کی بہادری اور عزم کا تذکرہ کرتے ہوئے کہا کہ اس کارروائی سے آپ نے قوم کے حوصلے بلند کیے ہیں اور قوم کو اتحاد کے دھاگے میں باندھ دیا ہے، آپ نے سرحدوں کی حفاظت کی ہے اور عزت نفس کو نئی بلندیاں دی ہیں، آپ نے ایک بے مثال اور ناقابل تصور حیرت انگیز کام کیا ہے۔
وزیراعظم نے فضائیہ کے جوانوں سے کہا کہ آپ کے اس اقدام سے نہ صرف پاکستان کے ائیر بیس کو شکست ہوئی بلکہ اس کے ناپاک عزائم اور حماقت کو بھی شکست ہوئی ہے۔
تینوں افواج اور دیگر افواج کے درمیان ہم آہنگی کی تعریف کرتے ہوئے انہوں نے کہا کہ سب کے درمیان ہم آہنگی بہترین ہے اور آپریشن سندور کا ہر لمحہ ہندستانی افواج کی طاقت کا منہ بولتا ثبوت ہے۔ انہوں نے کہا’’بحریہ نے سمندر پر اپنا تسلط برقرار رکھا، سرحد پر فوج مضبوط رہی، فضائیہ نے حملہ کرنے کے ساتھ ساتھ دفاع بھی کیا، جب کہ بی ایس ایف بھی محاذ پر مضبوطی سے کھڑی رہی‘‘۔
مودی نے کہا کہ فضائی دفاعی نظام نے بھی بہت اچھا کام کیا اور یہی انضمام ہے اور یہ افواج کی مضبوط شناخت بن چکا ہے۔