جموں:ایل او سی پر سکیورٹی صورتحال کا جائزہ

’جوان سکیورٹی چیلنجز کا مقابلہ کرتے ہوئے تیاری اور حوصلے کے اعلیٰ ترین معیار کو برقرار رکھیں‘
جموں//
فوج کے ایک سینئر افسر نے ہفتہ کے روز سرحدی اضلاع راجوری اور پونچھ کے تین سیکٹروں کا دورہ کیا اور سیکورٹی صورتحال کا جائزہ لیا۔
جموں میں واقع وائٹ نائٹ کور کے جنرل آفیسر کمانڈنگ (جی او سی) لیفٹیننٹ جنرل پی کے مشرا نے کرشنا گھاٹی اور بھمبر گلی سیکٹروں کا دورہ کیا جس کے دو دن بعد ہندوستان اور پاکستان کی افواج نے سرحدی انتظام پر تبادلہ خیال کرنے کے لئے ایل او سی پر بریگیڈ کمانڈر سطح کی فلیگ میٹنگ کی تھی۔
اس دورے کے دوران جی او سی اسٹریٹجک ایس آف اسپاڈس ڈویڑن ، جسے ۲۵؍ انفنٹری ڈویڑن بھی کہا جاتا ہے ، میجر جنرل کوشک مکھرجی لیفٹیننٹ جنرل مشرا کے ہمراہ تھے۔
جی او سی وائٹ نائٹ کور نے سپاڈس ڈویڑن کے جی او سی ایس کے ہمراہ کرشنا گھاٹی، بھمبر گلی اور نوشہرہ سیکٹرز کا دورہ کیا اور سیکیورٹی صورتحال کا جائزہ لیا اور آپریشنل تیاریوں کا جائزہ لیا۔
وائٹ نائٹ کور کی جانب سے جاری بیان میں کہا گیا ہے ’’انہوں نے فوجیوں کی پیشہ ورانہ مہارت کی تعریف کی اور تمام رینکس پر زور دیا کہ وہ سکیورٹی چیلنجز کا مقابلہ کرتے ہوئے تیاری اور حوصلے کے اعلیٰ ترین معیار کو برقرار رکھیں‘‘۔
جمعہ کی رات دیر گئے فوج کا ایک جونیئر کمیشنڈ افسر قریبی اکھنور سیکٹر میں دہشت گردوں کے خلاف انسداد دراندازی آپریشن کی قیادت کرتے ہوئے مارا گیا۔
عہدیداروں نے بتایا کہ حالیہ دنوں میں پونچھ اور راجوری اضلاع میں جنگ بندی کی خلاف ورزی کے متعدد واقعات رپورٹ ہوئے ہیں جس سے سرحدوں پر کشیدگی پیدا ہوگئی ہے۔
دریں اثناجموں کشمیر کے اکھنور سیکٹر میں ایل او سی کے قریب دہشت گردوں کے خلا ف انسدادِ دراندازی آپریشن کے دوران ہلاک ہونے والے جونیئر کمیشنڈ آفیسر (جے سی او) کو لیفٹیننٹ گورنر منوج سنہا اور آرمی چیف اوپیندرا دیویدی نے شاندار الفاظ میں خراج عقیدت پیش کیا ۔
معلوم ہوا ہے کہ جموں کے اکھنور میں قائم فوجی چھاونی میں ایک تعزیتی تقریب منعقد ہوئی جس میں فوج ، پولیس کے سینئر آفیسران نے شرکت کی اور بعد ازاں فوجی آفیسر کی میت کو آخری رسوم کی ادائیگی کیلئے ہماچل پردیش کیلئے روانہ کردیا گیا۔
حکام نے بتایا کہ ۱۰ویں انفنٹری ڈویژن کے جنرل آفیسر کمانڈنگ، میجر جنرل سمیر سریواستو اور جموں کے سینئر سپرنٹنڈنٹ آف پولیس، جوگندر سنگھ کی قیادت میں فوج، پولیس اور سول افسران نے صوبیدار کو خراج عقیدت پیش کیا ۔
واضح رہے کہ جمعے کی رات دیر گئے ، اکھنور سیکٹر کے کیری بھٹل علاقے میں ہندوستانی علاقے میں دراندازی کی کوشش کرنے والے دہشت گردوں کے ساتھ فائرنگ کے تبادلے میں جے سی او شہید ہو گئے تھے ۔
ایک پیغام میں لیفٹیننٹ گورنر سنہا نے کہا’’میں فوج کے بہادر صوبیدار کلدیپ چند کی عظیم قربانی کو سلام پیش کرتا ہوں، جنہوں نے فرض کی ادائیگی میں اپنی جان کا نذرانہ پیش کیا۔ ان کی بہادری اور قربانی کو کبھی فراموش نہیں کیا جائے گا۔ پوری قوم غم کی اس گھڑی میں شہید کے خاندان کے ساتھ مضبوطی سے کھڑی ہے ‘‘۔
فوج کے ایڈیشنل ڈائریکٹوریٹ جنرل آف پبلک انفارمیشن نے ایکس (سابقہ ٹوئٹر) پر ایک پوسٹ میں کہا کہ چیف آف آرمی اسٹاف جنرل اوپیندر دویدی اور ہندوستانی فوج کے تمام رینکس اس بہادر کی عظیم قربانی کو سلام پیش کرتے ہیں۔