سرینگر/26 مارچ
جموںکشمیر پولیس نے غیر قانونی سرگرمیاں (روک تھام) ایکٹ (یو اے پی اے ) کے تحت درج مقدمات کی تحقیقات کے ایک حصے کے طور پر سری نگر اور سوپور میں متعدد مقامات پر تلاشی کارروائیاں انجام دیں۔
پولیس کے مطابق یہ مقدمات کالعدم تنظیموں سے متعلق ہیں جن میں جموں و کشمیر مسلم کانفرنس (بٹ گروپ)، جموں و کشمیر مسلم لیگ (مسرت عالم گروپ) اور جموں و کشمیر ڈیموکریٹک فریڈم پارٹی (شبیر شاہ گروپ) شامل ہیں۔
ایک پولیس ترجمان نے اپنے بیان میں تفصیلات فراہم کرتے ہوئے کہا کہ سری نگر پولیس نے غیر قانونی سرگرمیاں (روک تھام) ایکٹ (یو اے پی اے ) کے تحت درج مقدمات کی تحقیقات کے ایک حصے کے طور پر سری نگر اور سوپور میں متعدد مقامات پر تلاشی کارروائیاں انجام دیں۔
ترجمان نے کہا”یہ مقدمات کالعدم تنظیموں سے متعلق ہیں جن میں جموں و کشمیر مسلم کانفرنس (بٹ گروپ)، جموں و کشمیر مسلم لیگ (مسرت عالم گروپ) اور جموں و کشمیر ڈیموکریٹک فریڈم پارٹی (شبیر شاہ گروپ) شامل ہیں“۔
ان کا بیان میں کہنا تھا”یہ تلاشیاں مذکورہ کالعدم تنظیموں کے مشتبہ ارکان کے سلسلے میں اور پولیس اسٹیشن راج باغ، سری نگر میں ایف آئی آر نمبر 15/2024 میں یو اے پی اے کی دفعہ 10، 13 اور آئی پی سی کی دفعہ 121، 121 ،پولیس اسٹیشن صدر میں درج ایف آئی آر نمبر 04/2024 یو اے پی اے کی دفعہ 10٬ 13 اور پولیس اسٹیشن شہید گنج میں یو اے پی اے کی دفعہ 10٬ 13 کے تحت درج ایف آئی آر نمبر 03/2024 اے کے تحت تحقیقات کو آگے بڑھانے کے لیے لی گئیں“۔
بیان میں کہا گیا کہ یہ چھاپے پروفیسر عبدالغنی بٹ ولد حبیب اللہ بٹ کی بٹ محلہ بوٹنگو سوپور اور وزیر باغ راج باغ سری نگر میں واقع رہائش گاہوں پر ایک ساتھ مارے گئے ۔انہوں نے کہا کہ شبیر احمد شاہ کی رہائش گاہ پر بھی ایف آئی آر نمبر 4/2024 کے تحت تلاشی لی گئی۔
پولیس ترجمان نے بتایا کہ ایف آئی آر نمبر 3/2024 کے سلسلے میں سری نگر میں سات مقامات پر تلاشی لی گئی اور غیر قانونی سرگرمیوں میں ملوث ہونے کا شبہ رکھنے والے افراد کو ٹارگیٹ کیا۔
ترجمان نے کہا کہ ان افراد میں مسرت عالم بٹ ولد عبدالمجید ساکن زینہ دار محلہ حبہ کدل،مشتاق احمد بٹ عرف گوگا ولد غلام قادر ساکن بٹہ مالو، غلام نبی وگے ولد عبدالسلام ساکن خانیار،فیروزاحمد خان ولد عبدالغنی خانیار،محمد نذیر خان ولد عبدالغفار ساکن کولی پورہ خانیار، حکیم عبدالرشید ولد غلام رسول ساکن بوٹہ کدل لال بازار اور جاوید احمد منشی عرف بل پاپا ولد غلام احمد ساکن میتھن چھانہ پورہ کے طورپر کی گئی ہے ۔
بیان کے مطابق یہ تلاشیاں سری نگر میں این آئی اے ایکٹ کے تحت نامزد معزز خصوصی جج سے سرچ وارنٹ حاصل کرنے کے بعد انجام دی گئیں۔
پولیس ترجمان نے کہا کہ قانونی طریقہ کار کے مطابق، تمام تلاشیاں ایگزیکٹو مجسٹریٹ اور آزاد گواہوں کی موجودگی میں لی گئیں۔انہوں نے کہا”تحقیقات کا مقصد جموں و کشمیر میں علاحدگی پسند اور دہشت گردی کے ماحولیاتی نظام کی باقیات کو ختم کرنا ہے اور اس طرح کی سرگرمیوں میں ملوث افراد کی شناخت اور ان کے خلاف قانونی کارروائی کرنا ہے ۔“
