بجٹ سال۲۰۲۵۔۲۶لوگوں کی توقعات سے بڑھ کر ہے :مرکزی وزیر

سرینگر//
اقلیتی اور پارلیمانی امور کے مرکزی وزیر کرن رجیجو نے بجٹ سال۲۰۲۵۔۲۰۲۶کو تاریخی بجٹ قرار دیتے ہوئے کہا کہ اس بجٹ سے مڈل کلاس سے وابستہ لوگوں کو بڑی راحت ملی ہے ۔انہوں نے کہا کہ یہ بجٹ سال۲۰۴۷کے وکشٹ بھارت کیلئے ایک بنیاد ہے ۔ان کا کہنا تھا کہ یہ بجٹ لوگوں کی توقعات سے بالاتر ہے ۔
مرکزی وزیر نے ان باتوں کا اظہار ہفتے کو یہاں’بجٹ پر چرچا‘کے موضوع پر منعقدہ ایک پریس کانفرنس سے خطاب کے دوران کیا۔
رجیجو نے کہا’’ہمارے سینئر وزرا خود ریاستوں کے دارلخلافوں اور اہم شہروں میں جا کر میڈیا کے ساتھ بات کر رہے ہیں تاکہ عوام تک بجٹ کی اہم باتوں کو پہنچایا جا سکے ‘‘۔
ان کا کہنا تھا’’بجٹ سال۲۰۲۵۔۲۰۲۶کو سال۲۰۴۷تک ملک کو وکشٹ بھارت بنانے کی ایک بنیاد ہے اس میں انفراسٹرکچر، مڈل کلاس، کسانوں، خواتین اور بچوں کیلئے خاص طور پر بڑی پیش کش کی گئی ہے ‘‘۔انہوں نے کہا کہ یہ بجٹ لوگوں کی توقعات سے بالاتر ہے ۔
رجیجو نے کہا’’جب ملک میں۲۰۱۴میں ہماری سرکار بنی تو سالانہ ۲لاکھ روپے تک ٹکیس میں چھوٹ تھی ہم نے اس کو بڑھا کر ۷لاکھ روپے کر دیا‘‘۔انہوں نے کہا کہ اس بجٹ میں ہم نے اس کو۷لاکھ سے بڑھا کر۱۲لاکھ کر دیا جو اب نہ صرف ملک میں بلکہ دنیا میں بحث کا باعث بن گیا ہے ۔ان کا کہنا تھا کہ اب ماہانہ ایک لاکھ روپیہ کمانے والے کو ایک روپیہ بھی ٹیکس نہیں ادا کرنا ہے ۔
مرکزی وزیر نے کہا کہ ملک کی تاریخ میں سادہ زندگی گذارنے والے لوگوں کو اتنا بڑا ریلیف آج تک کبھی نہیں ملا ہے ۔انہوں نے کہا کہ ہر شعبے میں اس قدر ٹیکس رکھا گیا ہے کہ مڈل کلاس کے لوگ اچھی طرح سے اپنی زندگی گذار سکیں۔ان کا کہنا تھا کہ جموں وکشمیر خاص طور پر کشمیر میں جو لوگ چھوٹے چھوٹے تجارت کر رہے ہیں جیسے سیب اگاتے ہیں یا دستکار ہیں ان کو بھی بہت بڑی راحت دی گئی ہے ۔
اقلیتی امور کے وزیر نے کہا کہ کشمیر کی دستکاریاں جو دنیا بھر میں مشہور ہیں کے لئے ٹیکس میں خاص طور پر ذکر ہے ۔انہوں نے کہا’’آنے والے دو چار مہینوں میں کشمیر میں ایک میلے کا انعقاد کیا جائے گا جس میں کشمیری دستکار اپنی چیزوں کی نمائش کرکے ان کو بیچ سکتے ہیں‘‘۔
رجیجو کا کہنا ہے کہ کشمیریوں دستکاریوں کو دنیا بھر میں پہنچانے کیلئے بھی بجٹ میں تذکرہ کیا گیا ہے ۔انہوں نے کہا کہ اس بجٹ سے چھوٹی اور متوسط درجے کی صنعتوں میں انقلاب آئے گا جس سے سماج کے ہر طبقے کو فائدہ پہنچے گا۔انہوں نے کہا کہ بجٹ میں جہاں کسانوں کیلئے بڑا اعلان کیا گیا ہے وہیں سکولوں اور کالجوں میں زیر تعلیم بچوں کو جدید ٹیکنالوجی سے ہم آہنگ کرانے کیلئے بھی ایک پلان ہے ۔