وزیر اعلی کا سونمرگ کا دورہ کیا، آگ سے ہونے والے نقصانات کا جائزہ

سونمرگ//
پرانے بازار سونمرگ میں حال ہی میں آتشزدگی کے تباہ کن واقعہ کے پیش نظر وزیر اعلیٰ‘ عمر عبداللہ نے متاثرہ مقام کا دورہ کیا اور نقصان ات کا جائزہ لیا اور متاثرہ دکانداروں کے ساتھ اظہار یکجہتی کیا۔
وزیراعلیٰ کے ہمراہ ان کے مشیر ناصر اسلم وانی، رکن قانون ساز اسمبلی کنگن میاں مہر علی اور ڈپٹی کمشنر گاندربل جتن کشور بھی موجود تھے۔ اپنے دورے کے دوران وزیر اعلیٰ نے سونمرگ مارکیٹ ایسوسی ایشن کے ممبران سے بات چیت کی اور ان سے ہمدردی کا اظہار کیا اور انہیں حکومت کی جانب سے مکمل تعاون کا یقین دلایا۔
عمرعبداللہ نے متاثرہ تاجروں کی مدد کرنے اور مستقبل میں اس طرح کے واقعات کی روک تھام کیلئے فوری اقدامات کو یقینی بنانے کیلئے اپنی حکومت کے عزم کا اعادہ کیا۔
بعد ازاں وزیراعلیٰ نے سونمرگ مارکیٹ ایسوسی ایشن کے ساتھ ایک اعلیٰ سطحی اجلاس کی صدارت کی جس میں ڈی سی ، ایس ایس پی ، ایس ڈی ایم کنگن ، سی ای او سونمرگ ڈیولپمنٹ اتھارٹی (ایس ڈی اے) اور دیگر ضلع افسران سمیت سینئر عہدیداروں نے شرکت کی۔
اجلاس میں تاجروں کے خدشات کو دور کرنے پر توجہ مرکوز کی گئی ، جنہوں نے فوری مالی امداد ، تعمیر نو کی اجازت اور سونمرگ میں فائر سروس اسٹیشن کے قیام جیسے اہم مطالبات پیش کیے۔
ان خدشات کا جواب دیتے ہوئے وزیراعلیٰ نے زور دیا کہ دکانوں کی تعمیر نو کیلئے ایک منصوبہ بند ڈیزائن پر عمل کیا جانا چاہئے جو محکمہ سیاحت ، ضلعی انتظامیہ اور ایس ڈی اے سمیت تمام اسٹیک ہولڈرز کی مشاورت سے تیار کیا گیا ہو۔
وزیر اعلیٰ نے یقین دلایا کہ اس نقطہ نظر سے حفاظت میں اضافہ ہوگا اور مستقبل میں اس طرح کے واقعات کی روک تھام ہوگی۔
ٹنل کے افتتاح کے بعد سونمرگ میں سیاحوں کی بڑھتی ہوئی آمد پر روشنی ڈالتے ہوئے چیف منسٹر نے علاقے میں مستقل فائر سروس اسٹیشن کی فوری ضرورت پر زور دیا۔
عمرعبداللہ نے تاجروں کو یقین دلایا کہ ایک مستقل فائر اسٹیشن قائم کیا جائے گا اور اس کے مقام کو متعلقہ اسٹیک ہولڈرز کی مشاورت سے حتمی شکل دی جائے گی تاکہ فوری ہنگامی رسپانس کو یقینی بنایا جاسکے۔
مزید برآں وزیراعلیٰ نے اعلان کیا کہ متاثرہ دکانوں کیلئے چیف منسٹر ریلیف فنڈ (سی ایم آر ایف) کے تحت مالی امداد کی منظوری دے دی گئی ہے جس سے اس مشکل وقت میں متاثرہ افراد کو کچھ مدد ملے گی۔