بھدرواہ :شر پسندوں کیخلاف سخت کارروائی کی جائیگی :کمار

ڈوڈہ///
حکام نے ضلع ڈوڈہ کے بھدرواہ علاقے میں ایک خاص طبقے کے جذبات کو مجروح کرنے والے پوسٹرس چسپاں کرنے اور انہیں وائرل کیے جانے کے بعد ممکنہ فرقہ وارانہ فسادات کو روکنے کی غرض سے سخت ترین بندشیں عائد کرنے کے علاوہ خطہ چناب کے سبھی اضلاع میں موبائل انٹرنیٹ خدمات کو بھی معطل کر دیا تھا۔
وہیں صوبائی کمشنر جموں رمیش کمار نے عوام سے صبر و تحمل اور امن و امان کی صورتحال برقرار رکھنے کی اپیل کرتے ہوئے کہا ’’شر پسند عناصر کے خلاف قانونی کارروائی کی جائے گی۔‘‘
حکام کے مطابق ضلع ڈوڈہ کے بھدرواہ علاقے بی جے پی کی معطل ترجمان نوپور شرما کے توہین آمیز ریمارکس کے خلاف احتجاج کے دوران مبینہ طور اشتعال انگیز تقاریر کی گئیں۔
تقاریر کی ویڈیوز وائرل ہونے کے بعد بعض مقامی باشندوں کی جانب سے ایک خاص طبقے کے لوگوں کے جذبات کو زک پہنچانے والے قابل اعتراض مواد کے بعد حالات اْس وقت حالات کشیدہ ہو گئے جب ان کے خلاف زبردست احتجاج کیا گیا۔
احتجاج کے بعد گرچہ حکام نے موبائل انٹرنیٹ خدمات کو معطل کرنے کے علاوہ بندشوں کا نفاذ بھی عمل میں لایا تاہم بندشوں کے باوجود بھدرواہ میں احتجاج کا سلسلہ جاری ہے۔
صوبائی کمشنر جموں، رمیش کمار نے ضلع ڈوڈہ کے بھدرواہ علاقے میں حالات کا جائزہ لینے کے بعد میڈیا نمائندوں کے ساتھ گفتگو کے دوران کہا کہ ’’بھدرواہ سمیت خطہ چناب میں حالات پر امن ہیں۔‘‘ انہوں نے کہا کہ مذہبی جذبات کو زک پہنچانے والوں کے خلاف کارروائی کی جائے گی۔
ادھر مقامی مسلم آبادی نے احتجاج کرتے ہوئے انتظامیہ کو شدید تنقید کا نشانہ بنایا۔ احتجاجیوں نے میڈیا نمائندوں کے ساتھ بات کرتے ہوئے کہا: ’’حکام کی جانب سے علاقے کی صورتحال کا جائزہ لینے کے لئے کئی افسران نے دورہ کیا اور فرقہ وارانہ ہم آہنگی کو زک پہنچانے والے افراد کے خلاف کارروائی کی صرف یقین دہانی کی جاتی ہے۔‘‘
مقامی آبادی نے الزام عائد کرتے ہوئے کہا: ’’ایک خاص طبقے کے دباؤ میں آکر یکطرفہ کارروائی کی جا رہی ہے۔‘‘
قابل ذکر ہے کہ بندشوں کے باوجود خطہ چناب خصوصا بھدرواہ علاقے کے متعدد مقامات پر لوگوں نے جلوس برآمد کیے اور گستاخ رسولؐ کے خلاف کارروائی کئے جانے کا مطالبہ کیا‘وہیں رپورٹس کے مطابق بعض مقامات پر معمولی پتھر بازی کے واقعات بھی رونما ہوئے ہیں۔ حکام کا کہنا ہے کہ علاقے میں حالات کشیدہ لیکن پْر امن ہیں۔