کٹرا بارہمولہ ٹریک کیلئے فوج اور سی آر پی ایف بڑے پیمانے پر سیکورٹی بندو بست کا حصہ

جموں//
کٹرا سے بارہمولہ جانے والی ٹرین ۲۰ جنوری کے آس پاس کسی بھی وقت روانہ ہونے والی ہے اور خاص طور پر ریاسی سے آگے کے ٹریک پر غیر معمولی حفاظتی انتظامات کئے گئے ہیں جہاں یہ وادی میں داخل ہونے سے پہلے دنیا کے سب سے اونچے ریل پل سمیت دور دراز علاقوں سے گزرے گی۔
سرکاری ذرائع نے بتایا کہ اودھم پور بارہمولہ ریلوے ٹریک کے انتہائی حساس حصے کے طور پر جانی جانے والی ریاسی سے بارہمولہ جانے والی ٹرینوں کیلئے فول پروف سیکورٹی کو یقینی بنانے کیلئے کثیر سطحی سیکورٹی انتظامات کو حتمی شکل دے دی گئی ہے۔ انہوں نے کہا کہ ٹرین کے آغاز سے پہلے ہی پورا سیکورٹی نظام تیار ہوجائے گا۔
ذرائع نے بتایا کہ فوج اور نیم فوجی سینٹرل ریزرو پولیس فورس (سی آر پی ایف) ریاسی کے بعد سے تمام ٹریک پر حفاظتی انتظامات کو تقویت بخشیںگے ، حالانکہ وہ ریلوے اسٹیشن پر ریلوے پروٹیکشن فورس (آر پی ایف) کے ذریعہ کی جانے والی حفاظت اور ٹرینوں کو چلانے میں براہ راست شامل نہیں ہوں گے۔
چناب پل کے تحفظ کے لیے فوج کی ایک مکمل کمپنی تعینات کی گئی ہے جسے دنیا کا بلند ترین ریلوے پل بھی کہا جاتا ہے۔ پل کی چوبیس گھنٹے حفاظت کی جائے گی اور یہ فوج کی نظروں میں رہے گا۔ اس پل نے پوری دنیا کی توجہ اپنی جانب مبذول کرائی ہے اور سیاحوں کے لئے ایک مشہور مقام بن گیا ہے کیونکہ یہ فرانس کے ایفل ٹاور سے۳۵ میٹر بلند ہے۔
ذرائع نے بتایا کہ ریلوے ٹریک ، ٹرینوں اور اثاثوں کیلئے انسداد بغاوت کے حصے کی دیکھ بھال گورنمنٹ ریلوے پولیس (جی آر پی) کرے گی ۔ انہوں نے مزید کہا کہ کٹرا بارہمولہ ٹریک پر مسافروں ، ٹرینوں اور ریلوے اثاثوں کی حفاظت کو یقینی بنانے کیلئے جی آر پی اور آر پی ایف کو مناسب تعداد میں تعینات کیا جارہا ہے۔
ذرائع نے کہا کہ جموں کشمیر پولیس بھی ریل خدمات کے تحفظ کو یقینی بنانے میں اپنا کردار ادا کرے گی۔ مقامی پولیس اور اسپیشل آپریشن گروپ (ایس او جی) ریلوے ٹریک، ریلوے اسٹیشن اور ریلوے کے اثاثوں کے ساتھ علاقے پر غلبہ حاصل کرنے میں شامل ہوں گے۔ ٹریک کے قریب کے علاقوں میں پولیس اور ایس او جی کی متعدد نئی چوکیاں تشکیل دی گئی ہیں اور علاقے پر غلبہ حاصل کرنے کے لئے اضافی اہلکار تعینات کیے گئے ہیں۔
اس کے علاوہ تمام ریلوے اسٹیشنوں پر روانگی سے قبل ٹرینوں کی صفائی اور مسافروں کی تلاشی لی جائے گی۔ ٹریک کے ساتھ تمام سرنگوں اور پلوں کے اندر اور باہر چوبیس گھنٹے گشت بھی کیا جائے گا۔
فی الحال ٹرین خدمات شری ماتا ویشنو دیوی جی مندر کے بیس کیمپ کٹرا تک چلتی ہیں۔ اودھم پور کے راستے جموں سے کٹرا تک کا ٹریک عام طور پر پرامن علاقوں سے گزرتا ہے۔ تاہم، ریاسی سے بارہمولہ تک کے ٹریک میں بہت سے اہم علاقے ہیں جو پہلے عسکریت پسندی کا شکار تھے اور سیکورٹی ایجنسیاں کوئی خطرہ مول نہیں لینا چاہتیں۔
ضلع ریاسی میں واقع چناب ریل پل دریا کی سطح سے۳۵۹ میٹر (۱۱۷۸ فٹ) بلند ہے، جو اسے پیرس کے ایفل ٹاور سے ۳۵ میٹر اونچا بناتا ہے۔انجی کھڈ پل کی کل لمبائی ۲۵ء۴۷۳ میٹر ہے، جس میں ۱۲۰میٹر چوڑا پل اور۲۵ء۹۴میٹر کا مرکزی باندھ شامل ہے۔
دہلی سے کشمیر کیلئے ٹرین خدمات کے افتتاح کے سلسلے میں ، ریلوے سیفٹی کمشنر ۷؍اور ۸جنوری کو قانونی معائنہ اور حتمی ٹرائل کریں گے۔
ذرائع نے بتایا کہ وزیر اعظم نریندر مودی ریلوے سیفٹی کمشنر کی جانب سے قانونی معائنے کے بعد ٹریک کی حفاظت کے بارے میں کلیئرنس ملنے کے بعد کشمیر کیلئے پہلی ٹرین کو ہری جھنڈی دکھائیں گے۔ تاہم افتتاح کی تاریخ کو ابھی حتمی شکل نہیں دی گئی ہے۔