پولیس کا بڈگام میں ہائبرڈ ملی ٹینٹ اور اُس کے ساتھی کی گرفتاری کا دعویٰ

سرینگر//
جموںکشمیر پولیس نے وسطی ضلع بڈگام میں ہائبرڈ ملی ٹینٹ اور اُس کے ساتھی کو اسلحہ وگولہ بارود سمیت حراست میں لینے کا دعویٰ کیا ہے ۔
پولیس کے ایک ترجمان نے بتایا کہ مصدقہ اطلاع موصول ہونے کے بعد۶۲آر آر‘۴۳بٹالین سی آر پی ایف اور جموں وکشمیر پولیس نے لشکر طیبہ سے وابستہ ایک ہائبرڈ جنگجو اور اُس کے ساتھی کو حراست میں لے لیا۔
ترجمان نے گرفتار ہائبرڈ جنگجو کی شناخت مدبر اعجاز ولد اعجاز احمد ساکن گلشن آباد حیدر پورہ اور اُس کے ساتھی کی پہچان سعید منتہا معراج ولد سعید معراج الدین ساکن نیو کالونی اوم پورہ کے بطور کی ہے ۔
پولیس ترجمان نے بتایا کہ ابتدائی تحقیقات کے دوران معلوم ہوا ہے کہ گرفتار ہابرڈ ملی ٹینٹ اور اُس کا ساتھی وسطی ضلع بڈگام میں سرگرم جنگجووں کو منطقی مدد فراہم کرنے کے ساتھ ساتھ اسلحہ وگولہ بارود کو ایک جگہ سے دوسری جگہ پہنچانے میں بھی پیش پیش رہتے تھے ۔
ترجمان نے بتایا کہ گرفتار شدگان کے قبضے سے ایک چینی گرینیڈ ‘۳۵اے کے گولیوں کے راونڈ اور دوسرا قابل اعتراض مواد برآمد کرکے ضبط کیا گیا ۔
پولیس نے معاملے کی نسبت ایف آئی آر زیر نمبر ۱۹۰ے تحت کیس درج کرکے مزید تحقیقات شروع کی ہے ۔