حکومت دہشت گردی سے پاک جموں کشمیرکے ہدف کو جلد حاصل کرےگی:شاہ

نئی دہلی/۱۹دسمبر
مرکزی وزیر داخلہ امت شاہ نے کہا ہے کہ حکومت دہشت گردی کے خلاف زیرو ٹالرینس کی پالیسی کے تحت جلد از جلد ’دہشت گردی سے پاک جموں و کشمیر‘کے ہدف کو حاصل کرے گی۔
شاہ نے جمعرات کو یہاں جموں و کشمیر پر ایک اعلیٰ سطحی سیکورٹی جائزہ میٹنگ کی صدارت کی۔ میٹنگ میں جموں و کشمیر کے لیفٹیننٹ گورنر منوج سنہا، مرکزی ہوم سیکرٹری، ڈائریکٹر (آئی بی)، را چیف، آرمی چیف، جی او سی-ان-سی (ناردرن کمانڈ)، ڈی جی ایم او، جموں و کشمیر کے چیف سیکرٹری اور ڈائریکٹر جنرل آف پولیس، سینٹرل آرمڈ پولیس فورسز کے ڈائریکٹر جنرل اور وزارت داخلہ کے سینئر افسران نے شرکت کی۔
میٹنگ سے خطاب کرتے ہوئے ، مرکزی وزیر داخلہ نے کہا”وزیر اعظم نریندر مودی کی قیادت میں دہشت گردی کے خلاف زیرو ٹالرنس کی پالیسی کے تحت، ہم دہشت گردی سے پاک جموں و کشمیرکے ہدف کو جلد از جلد حاصل کریں گے اور اس کے لئے تمام وسائل دستیاب کرائے جائیں گے ۔
شاہ نے کہا کہ مودی حکومت تمام سیکورٹی فورسز کی مشترکہ کوششوں سے جموں و کشمیر میں دہشت گردی پر مکمل تسلط قائم کرنے کے لیے پرعزم ہے ۔
وزیر داخلہ نے کہا کہ اسمبلی انتخابات اور لوک سبھا انتخابات میں جموں و کشمیر کے لوگوں کی بے مثال شرکت اس بات کو ظاہر کرتی ہے کہ انہیں ملک کی جمہوریت پر پورا بھروسہ ہے ۔ وزیر داخلہ نے دہشت گردی کے واقعات، دراندازی اور دہشت گرد تنظیموں میں نوجوانوں کی بھرتی میں نمایاں کمی کے لئے سیکورٹی اداروں کی کوششوں کو سراہا۔
شاہ نے کہا کہ مودی حکومت کی مسلسل اور مربوط کوششوں کی وجہ سے جموں و کشمیر میں دہشت گردی کا ماحولیاتی نظام تقریباً ختم ہو چکا ہے ۔ انہوں نے تمام سیکورٹی ایجنسیوں کو ہدایت دی کہ وہ جموں و کشمیر میں دہشت گردی کے خاتمے کے لیے مربوط انداز میں کام جاری رکھیں۔
وزیر داخلہ نے ایریا ڈومینیشن پلان اور زیرو ٹیرر پلان کو مشن موڈ میں نافذ کرنے پر زور دیا۔