شام سے جموں کشمیر کے۴۴ زائرین بحفاظت واپس

نئی دہلی//
ہندوستان نے بدھ کے روز شام سے۷۵ ہندوستانی شہریوں کو نکالا ہے جن میں جموں و کشمیر سے۴۴ زائرین شامل ہیں۔
وزارت خارجہ نے کہا کہ تمام ہندوستانی شہری بحفاظت لبنان پہنچ گئے ہیں اور تجارتی پروازوں کے ذریعہ ان کی ہندوستان واپسی ہو گی۔
وزارت نے کہا کہ، دمشق اور بیروت میں ہندوستانی سفارت خانوں کے تعاون سے، سیکورٹی کی صورتحال کا جائزہ لینے اور شام میں ہندوستانی شہریوں کی درخواستوں کے بعد انخلاء کا کام شروع کیا گیا۔
شام سے نکالے جانے والوں میں جموں و کشمیر کے۴۴زائرین بھی شامل ہیں جو شیعہ مسلمانوں کے عقیدے کے اعتبار سے اہم مانی جانے والی دمشق میں موجود سیدہ زینب کے مزار میں پھنسے ہوئے تھے۔ زیادہ تر زائرین اس جگہ بیماریوں سے نجات کی دعا کرنے آتے ہیں۔
ہندوستان نے پیر کو حزب اختلاف کی افواج کے ذریعہ بشار الاسد کی حکومت کا تختہ الٹنے کے بعد شام میں استحکام کے مطالبے میں دوسرے ممالک کا ساتھ دیا۔ نئی دہلی نے تمام اسٹیک ہولڈرز پر زور دیا کہ وہ مغربی ایشیائی ملک کے اتحاد، خودمختاری اور علاقائی سالمیت کو برقرار رکھیں۔