صارفین تمام ہیٹنگ آلات ایک ساتھ چلانے سے گریز کریں

سرینگر/
کشمیر پاور ڈِسٹری بیوشن کارپوریشن لمیٹڈ (کے پی ڈِی سی ایل) نے آج اپنے صارفین پر زور دیا کہ وہ ایک ہی وقت تمام ہیٹنگ گیجٹس کو چلانے سے گریز کریں جس سے سسٹم شدید طور پر متاثر ہوتا ہے اور اِس کے نتیجے میں بجلی کی فراہمی منقطع ہو جاتی ہے ۔ اُنہوں نے کہا کہ جس کی وجہ سے غیر شیڈول کٹوتی ہوتی ہے۔
چیف اِنجینئرڈِسٹری بیوشن کے پی ڈی سی ایل اِنجینئر عاقب وحید دیوا نے آج یہاں ایک پریس بیان میں صارفین کو مشورہ دیا کہ وہ کٹوتی کے اوقات کے بعد بجلی کی فراہمی کی بحالی کے وقت اَپنے ہیٹنگ لوڈ کو ایڈجسٹ کریں۔ اُنہوں نے ڈِی ٹی نقصان کی بنیادی وجہ ممنوعہ کروڈ ہیٹر اور بوائیلروں کے بے تحاشہ اِستعمال کی نشاندہی کرتے ہوئے کہا،’’۱۵ یا۲۰ منٹ کے اندر بجلی کی بندش بنیادی طور پر تمام ہیٹنگ گیجٹس پر بیک وقت بجلی کی فراہمی کی وجہ سے ہوتا ہے۔‘‘
چیف اِنجینئر نے یقین دِلایا کہ اگر ہیٹنگ لوڈ کو صارفین کے منظور شدہ لوڈ کے اندر مناسب طریقے سے ہم آہنگ کیا جائے تو غیر شیڈول شدہ بجلی کی بندش ختم ہو جائے گی۔
دیوا نے ڈی ٹیز کو نقصان سے بچانے کیلئے صارفین سے تعاون طلب کرتے ہوئے کہا کہ نومبر۲۰۲۴ ء کے مہینے میں۱۰۴۳ ڈی ٹیز کو غیر منظور شدہ لوڈ کی وجہ سے نقصان پہنچااور اسی مہینے کے دوران کے پی ڈِی سی ایل نے۱۰۳۵ ڈی ٹیز بحال کئے تاکہ صارفین کو سرمائی مہینوں میں جب درجہ حرارت صفر سے نیچے گر جاتا ہے تو اُنہیں سہولیت فراہم کی جاسکے۔‘‘
چیف اِنجینئر نے مزید کہا کہ کے پی ڈِی سی ایل مختلف ڈویژنل ورکشاپوں کے ساتھ ساتھ سینٹرل ورکشاپ پانپورمیں اپنے خراب شدہ ڈی ٹیزکو دوبارہ حاصل کرکے۱۵۵۴ ڈی ٹیز کے بفر سٹاک کو برقرار رکھے ہوئے ہے۔