گوئل کا سعودی عرب کا دورہ اختتام پذیر، اقتصادی تعلقات کو مضبوط بنانے کے لیے بامعنی بات چیت ہوئی

نئی دہلی// تجارت و صنعت کی مرکزی وزارت نے جمعہ کو کہا کہ تجارت اور صنعت کے وزیر پیوش گوئل کا سعودی عرب کا دورہ دونوں ممالک کے درمیان اقتصادی اور تجارتی تعلقات کو مزید مضبوط بنانے کے لیے معنی خیز اقدامات کے ساتھ اختتام پذیر ہوا۔
اس دورے کے دوران مسٹر گوئل نے سعودی عرب کے توانائی، صنعت اور معدنی وسائل کے محکموں کے وزراء سے ملاقات کی۔ وزارت سے جاری ایک ریلیز کے مطابق دورے کے دوران مسٹر گوئل نے بین الاقوامی سرمایہ کار کانفرنس فیوچر انویسٹمنٹ انیشیٹو (ایف آئی آئی) کے آٹھویں ایڈیشن کے مکمل اجلاس میں کئی ممالک کے نمائندوں اور عالمی کمپنیوں کے سینئر ایگزیکٹوز کے ساتھ میٹنگ کی۔
وزارت نے کہا ہے کہ "مسٹر گوئل کا یہ دورہ ہندوستان اور سعودی عرب کے درمیان اسٹریٹجک شراکت داری کو مضبوط بنانے میں ایک اہم سنگ میل ہے ۔ یہ دورہ اقتصادی تعلقات کو مزید مضبوط بنانے اور باہمی تعاون کے ذریعے عالمی چیلنجوں سے نمٹنے کے لیے دونوں ممالک کے عزم کو اجاگر کرتا ہے ۔ توقع ہے کہ اس بات چیت کے نتیجے میں سرمایہ کاری اور تجارت کی نئی راہیں کھلیں گی، دونوں ممالک میں اقتصادی ترقی اور جدت کو فروغ ملے گا۔
وزارت نے کہا کہ وزیر تجارت نے ایف آئی آئی کانفرنس میں بات چیت کے دوران عالمی تعاون، اختراعات، تکنیکی ترقی اور سرمایہ کاری کو فروغ دینے میں بین الاقوامی شراکت داری اور اقتصادی سفارت کاری کے اہم کردار کو اجاگر کیا۔ انہوں نے دنیا بھر کے سرمایہ کاروں پر زور دیا کہ وہ ہندوستان میں ابھرتے ہوئے مواقع سے فائدہ اٹھائیں، خاص طور پر مصنوعی ذہانت، قابل تجدید توانائی، ڈیجیٹل انفراسٹرکچر اور جدید مینوفیکچرنگ جیسے اعلیٰ ترقی والے شعبوں میں۔
مسٹر گوئل نے بدھ کو ریاض میں سعودی عرب کے وزیر توانائی شہزادہ عبدالعزیز بن سلمان السعود کے ساتھ ہندوستان-سعودی اسٹریٹجک پارٹنرشپ کونسل (ایس پی سی) کے تحت اقتصادیات اور سرمایہ کاری کمیٹی کی دوسری وزارتی میٹنگ کی بھی شریک صدارت کی۔ یہ کونسل اکتوبر 2019 میں وزیر اعظم نریندر مودی کے دورہ سعودی عرب کے دوران قائم کی گئی تھی۔