’ شہری منصوبہ بندی کو لچکدار ہونا چاہئے‘

ای بسوں کو اسپتالوں اور زیادہ مانگ والے علاقوں سے جوڑنا جوابدہ نیٹ ورک کیلئے ضروری ہے:وزیرا علیٰ
سرینگر//
وزیراعلیٰ‘عمر عبداللہ نے آج یہاں سول سیکرٹریٹ میں محکمہ ہاؤسنگ اینڈ اربن ڈیولپمنٹ (ایچ اینڈ یو ڈی ڈی) کا جامع جائزہ لیا۔
جائزہ اجلاس کا مقصد محکمہ کی پیشرفت کا جائزہ لینا، چیلنجز کی نشاندہی کرنا اور شہری ترقی کے منصوبوں کیلئے ترجیحات کا تعین کرنا تھا۔
جائزہ اجلاس کا آغاز کمشنر سکریٹری مندیپ کور نے ایک تفصیلی پریزنٹیشن کے ساتھ کیا ، جنہوں نے ایچ اینڈ یو ڈی ڈی اور اس سے وابستہ تنظیموں کے کام کاج کا خاکہ پیش کیا۔
مختلف اسکیموں اور محکمانہ ضروریات کیلئے مرکزی فنڈنگ کے علاوہ اہم امور بشمول پالیسی خلا، فرسودہ ماسٹر پلان اور ترقیاتی اتھارٹیز کے اوورلیپنگ مینڈیٹ پر تبادلہ خیال کیا گیا۔
اجلاس میں انسانی وسائل کو معقول بنانے اور اسمارٹ سٹی اقدامات کی طویل مدتی افادیت کو یقینی بنانے کے بارے میں خدشات پر بھی روشنی ڈالی گئی۔
ملاقات کے دوران وزیراعلیٰ عمر عبداللہ نے شہری ترقی سے موثر انداز میں نمٹنے کیلئے ٹاؤن پلاننگ کی کوششوں کو مضبوط بنانے کی اہمیت پر زور دیا۔
وزیراعلیٰ نے کہا کہ ہماری ٹاؤن پلاننگ کی تاثیر ہمارے شہروں کے مستقبل کے رہنے کی قابلیت کا تعین کرے گی۔ انہوں نے اس بات پر زور دیا کہ بڑھتی ہوئی آبادی کی ضروریات کو پورا کرنے کیلئے شہری منصوبہ بندی کو لچکدار ہونا چاہئے۔
میٹنگ کے دوران تنظیم سے متعلق امور، پالیسی اصلاحات کے اقدامات اور جموں اسمارٹ سٹی لمیٹڈ اور سرینگر اسمارٹ سٹی لمیٹڈ کے ذریعہ نافذ کئے گئے منصوبوں کی تازہ کاریوں پر بھی تبادلہ خیال کیا گیا۔
وزیراعلیٰ نے منصوبے کی تفصیلی تجاویز اور ان کی موجودہ صورتحال کا جائزہ لیا اور نمایاں پیش رفت کو آگے بڑھانے کے لئے فوری کارروائی اور احتساب پر زور دیا۔
’فیم ٹو‘ اور پی ایم ای بس سیوا اسکیم کے تحت ای بس منصوبے کے حوالے سے وزیر اعلیٰ نے سٹی روٹس پر ای بس فریکوئنسی بڑھانے کی ہدایت کی اور ہدایت کی کہ روٹس کو وسعت دے کر اہم ہسپتالوں کو بھی شامل کیا جائے۔
عمرعبداللہ کاکہنا تھا’’شہریوں کو قابل اعتماد اور قابل رسائی نقل و حمل کے اختیارات کی ضرورت ہے۔ای بسوں کو اسپتالوں اور زیادہ مانگ والے علاقوں سے جوڑنا ایک جوابدہ شہری نقل و حمل نیٹ ورک کیلئے ضروری ہے‘‘۔
اجلاس میں اہم شہری ترقیاتی اسکیموں جیسے سی آئی ٹی آئی آئی ایس۰ء۲/ امرت۰ء۲، پی ایم اے وائی (شہری)، قومی شہری ذریعہ معاش مشن اور نیشنل کلین ایئر پروگرام کا جائزہ بھی شامل تھا۔
عمر عبداللہ نے محکمہ کی حوصلہ افزائی کی کہ وہ منصوبے کے نفاذ میں حائل رکاوٹوں کو دور کرے۔ انہوں نے کہا’’ان پروگراموں پر موثر عمل درآمد ہمارے شہروں کو تمام رہائشیوں کیلئے صاف اور زیادہ پائیدار جگہوں میں تبدیل کر سکتا ہے‘‘۔
وزیر اعلیٰ نے جموںکشمیر کے تمام شہری باشندوں کے لئے معیار زندگی کو بہتر بنانے کے مقصد سے ایک جامع اور پائیدار شہری ترقی کے نقطہ نظر کیلئے اپنی حکومت کے عزم کا اعادہ کیا۔
اجلاس میں وزیر اعلی ٰ کے مشیر ناصر اسلم وانی، چیف سکریٹری اٹل ڈولو، چیف منسٹر کے ایڈیشنل چیف سکریٹری دھیرج گپتا، کمشنر سکریٹری ایچ اینڈ یو ڈی ڈی مندیپ کور، کشمیر اور جموں ڈویڑن کے ڈویڑنل کمشنرز اور سرینگر اور جموں میونسپل کارپوریشن کے کمشنرز نے شرکت کی۔