کشمیر کے پہاڑی علاقوں میں برف وباراں کا امکان

سرینگر//
محکمہ موسمیات نے وادی کشمیر کے پہاڑی علاقوں میں اگلے چوبیس گھنٹوں کے دوران برف وباراں کی پیش گوئی کی ہے ۔
متعلقہ محکمے کے ایک ترجمان نے بتایا کہ وادی میں پیر کے روز موسم مجموعی طور پر ابر آلود رہنے کا امکان ہے ۔
ترجمان نے کہا کہ اس دوران شام کے وقت وادی کے کئی پہاڑی علاقوں میں ہلکی بارشیں یا ہلکی برف باری متوقع ہے ۔
ان کا کہنا ہے کہ وادی میں۲۹؍اکتوبر کو بھی موسم مجموعی طور پر ابر آلود رہ سکتا ہے اور اس دوران شمالی اور وسطی کشمیر کے پہاڑی علاقوں میں ہلکی برف باری یا بارشوں کا امکان ہے ۔
ادھر ماہر موسمیات فیضان عارف کا ماننا ہے کہ اس دوران شمالی کشمیر میں واقع مشہور سیاحتی مقام گلمرگ اور وسطی کشمیر کے ضلع گاندربل میں واقع سیاحتی مقام سونہ مرگ میں برف باری کا امکان ہے جبکہ زوجلا پاس پر بھی برف باری ہوسکتی ہے ۔
عارف نے کہا کہ وادی کے بالائی علاقوں میں۳۰؍اکتوبر کی صبح بھی ہلکی برف باری ہونے کا امکان ہے تاہم اس کے بعد وادی میں۸نومبر تک موسم خشک رہنے کی توقع ہے ۔
ان کا کہنا ہے کہ کشمیر کے میدانی علاقوں میں فی الوقت برف باری کا کوئی امکان نہیں ہے ۔
محکمے نے اپنی ایڈوائزری میں کسانوں سے کھیت کھلیانوں میں اپنے آپریشنز جاری رکھنے کو کہا ہے اور کاٹی ہوئی فصل کا محفوظ ذخیرہ کرنے کی صلاح دی ہے ۔