پنچایتی انتخابات میں پیسے اور طاقت کا استعمال کرنے والوں کو مسترد کردیں: مان

ستوج (سنگرور)// پنجاب کے وزیر اعلی بھگونت سنگھ مان نے جمعرات کو ریاست کے عوام سے کہا کہ وہ آئندہ پنچایتی انتخابات میں پیسے اور طاقت کا استعمال کرنے والوں کو مکمل طور پر مسترد کردیں۔
وزیر اعلیٰ نے کہا کہ پنچایتی انتخابات ملک میں جمہوری نظام کی بنیاد ہیں۔ ان انتخابات کا مقصد عوام کو نچلی سطح پر جمہوریت کا حصہ بنانا ہے ۔ انہوں نے کہا کہ ریاستی حکومت اس بات کو یقینی بنانے کے لیے پرعزم ہے کہ یہ انتخابات آزادانہ، منصفانہ اور پرامن طریقے سے کرائے جائیں۔
وزیر اعلیٰ نے کہا کہ لوگ پنچایتوں میں منتخب ہونے والے امیدواروں کے بارے میں اتفاق رائے پیدا کریں۔ انہوں نے کہا کہ عوام ان انتخابات میں پیسے اور طاقت کے استعمال کی حوصلہ شکنی کریں، تاکہ یہ جمہوری عمل کا لازمی حصہ بن سکے ۔ انہوں نے کہا کہ پارٹی کے نشان کے بغیر امیدوار ریاست میں پنچایتی انتخابات میں حصہ لے رہے ہیں۔ اس سے دیہات میں دھڑے بندی ختم ہوگی اور دیہی علاقوں کی ہمہ جہت ترقی کو یقینی بنایا جائے گا۔ مسٹر مان نے کہا کہ ریاستی حکومت نے وسیع تر عوامی مفاد میں ایک انقلابی فیصلہ کیا ہے تاکہ امیدواروں کو پارٹی نشانات پر الیکشن لڑنے سے روکا جا سکے ۔
وزیر اعلیٰ نے اعلان کیا کہ جو بھی گاؤں متفقہ طور پر پنچایت کا انتخاب کرے گا، اسے اسٹیڈیم، اسکول یا اسپتال کے ساتھ 5 لاکھ روپے کی گرانٹ دی جائے گی اور اس کے علاوہ جو بھی ضرورت ہوگی۔ انہوں نے گاؤں والوں پر زور دیا کہ وہ متفقہ طور پر اپنی پنچایت کا انتخاب کرکے ریاست میں ایک مثال قائم کریں اور کہا کہ انہوں نے اپنے آبائی گاؤں کی ترقی کے لیے کوئی کسر نہیں چھوڑی ہے ۔