سپریم کورٹ نہ کہتی تو بی جے پی جموںکشمیر میں الیکشن نہ کراتی

سرینگر//
کانگریس کے قومی جنرل سیکریٹری اور راجستھان کے سابق نائب وزیر اعلیٰ سچن پائلٹ نے کہا ہے کہ بھارتیہ جنتا پارٹی (بی جے پی) کو جمہوریت اور عوامی جذبات پر کوئی بھروسہ نہیں ہے ۔
پائلٹ نے کہا ہے کہ سپریم کورٹ کی وجہ سے اسمبلی انتخابات ہو رہے ہیں۔ جبکہ بی جے پی جموں و کشمیر میں الیکشن نہیں کروانا چاہتی۔
کانگریسی لیڈرنے یہ بات جموں کشمیر میں انتخابی مہم کے دوران کہی۔
پائلٹ نے انتخابی جلسوں میں کہا کہ بی جے پی نے جموں و کشمیر کے عوام کی فلاح و بہبود کے لیے کیا کام کیا ہے جس کے نام پر وہ آج عوام سے ووٹ مانگ رہی ہے ۔ انہوں نے کہا کہ حکومت کو اپنی بیساکھیاں بچانے کے لیے مرکزی حکومت نے ایک یا دو ریاستوں میں لاکھوں کروڑوں روپے تقسیم کیے اور ان لوگوں کو کچھ نہیں دیا جو ضرورت مند تھے اور جن سے بی جے پی نے وعدے کیے تھے ۔
کانگریس کے لیڈر نے کہا کہ وہ بی جے پی کی منفی سوچ اور تکبر کا جواب دینے اور لوک سبھا انتخابات میں اسے اکثریت سے تجاوز کرنے کی اجازت نہ دینے کے لئے ملک کے عوام کے شکر گزار ہیں۔
پائلٹ نے الزام لگایا کہ بی جے پی لوگوں کو ڈرا کر اور خوف کا ماحول بنا کر اقتدار پر قبضہ کرنا چاہتی ہے ۔
پائلٹ بدھ اور جمعرات کو جموں و کشمیر کے انتخابی دورے پر تھے ۔انہوں نے۱۸ستمبر کو پونچھ ضلع کے سورنکوٹ، تھانہ منڈی اور جموں جنوبی کے راجوری کے اسمبلی حلقوں اور ۱۹ستمبر کو راجوری اسمبلی حلقہ میں کانگریس امیدواروں کی حمایت میں انتخابی ریلیوں سے خطاب کیا۔