پاکستان کرکٹ ٹیم کو دوبارہ شکست دے سکتے ہیں، امریکی فاسٹ باؤلر کا بڑا دعویٰ

نیویارک //
پاکستانی نژاد امریکی کرکٹر علی خان نے دعویٰ کیا ہے کہ ہم پاکستان کرکٹ ٹیم کو دوبارہ شکست دے سکتے ہیں۔ انہوں نے اپنے ایک حالیہ انٹرویو میں آئی سی سی ٹی ٹونٹی ورلڈ کپ 2024ء میں پاکستان کے خلاف میچ سے متعلق سوالات کے جواب دیئے۔ انہوں نے کہا کہ ہم دباؤ میں نہیں تھے بلکہ وہ تھے، ہمیں معلوم تھا کہ ہم انہیں ہرانے کے قابل ہیں۔
علی خان کا کہنا تھا کہ ہم نے اس میچ میں فٹنس سمیت چاروں شعبوں میں پاکستان کو شکست دی۔ ہم پاکستان کو دوبارہ شکست دینے کے قابل ہیں، میں سمجھتا ہوں کہ ہم واقعی ایک اچھی ٹیم ہیں۔ امریکی کرکٹ ٹیم کے فاسٹ باؤلر نے کہا کہ اگر ہمارے پاس پوری طاقت کا سکواڈ ہو تو ہم اپنے اچھے دن نہ صرف پاکستان بلکہ کسی بھی ٹیم کو ہرا سکتے ہیں۔
انہوں نے مزید کہا کہ یہ بہت اچھی بات ہوگی اگر ہم پاکستان کے خلاف پھر کھیلیں۔
خیال رہے کہ ٹی ٹونٹی ورلڈکپ میں پاکستان کو گروپ اسٹیجز میں امریکا کے خلاف شکست کا سامنا کرنا پڑا تھا۔ پاکستان کیخلاف فتح امریکہ کے لیے ایک اہم بات تھی تاہم مین ان گرین کو اس کے بعد بنگلہ دیش کے خلاف ہوم ٹیسٹ سیریز میں مایوس کن شکست سمیت مزید چیلنجز کا سامنا کرنا پڑا۔ بنگلہ دیش نے دو میچوں کی سیریز کے دونوں میچز کافی بھاری مارجن سے جیت کر پاکستان کے خلاف اپنی پہلی ٹیسٹ فتح اور سیریز کامیابی حاصل کرکے ایک تاریخی کارنامہ انجام دیا۔