سری نگر اور گاندربل میں آتشزدگی میں ہوٹل اور بینڈ سال مل کو نقصان

سرینگر//
سرینگر اور گاندربل میں آگ کی دو الگ الگ وارداتوں میں ہوٹل اور بینڈ سا مل کو نقصان پہنچا ہے ۔
اطلاعات کے مطابق بدھ کی دوپہر سری نگر کے راجباغ علاقے میں ہوٹل لکی اکبر سے آگ نمودار ہوئی جس نے آناً فاناً اوپری منزل کو لپیٹ میں لے لیا۔
معلوم ہوا ہے کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں آگ کو مزید پھیلنے سے روک دیا گیا۔
فائر اینڈ ایمرجنسی کے ایک عہدیدار نے بتایا کہ آٹھ فائر ٹینڈروں کی مدد سے آگ پر قابو پایا گیا۔ انہوں نے کہاکہ آتشزدگی کی اس واردات میں ہوٹل عمارت کی اوپری منزل کو جزوی نقصان پہنچا ہے ۔
دریں اثنا وسطی کشمیر کے ضلع گاندربل کے تولہ مولہ علاقے میں آگ کی ایک بھیانک واردات میں ایک بینڈ سا مل مکمل طور پر خاکستر ہوگئی۔
ذرائع نے بتایا کہ گاندربل کے تولہ مولہ علاقے میں محمد اکبر بابا اور فاروق احمد کی بینڈ سا مل میں آگ نمودار ہوئی جس کے شعلوں نے اس کو پوری طرح اپنی لپیٹ میں لے لیا۔
انہوں نے کہا کہ اطلاع موصول ہوتے ہی فائر ٹنڈرس اور پولیس جائے واردات پر پہنچے اور آگ کو قابو کرنے کی کوششوں میں جٹ گئے ۔
ذرائع کا کہنا تھا کہ آگ کی اس واردات میں مل پوری طرح خاکستر ہوگئی جبکہ اس میں موجود لکڑی بھی راکھ کے ڈھیر میں تبدیل ہوگئی۔
آگ لگنے کی وجہ معلوم کی جا رہی ہے تاہم اس واردات میں کسی کے زخمی ہونے کی کوئی اطلاع نہیں ہے ۔
دریں اثنا پولیس نے اس ضمن میں ایک کیس درج کرکے تحقیقات شروع کی ہے۔