دس روزہ گرمائی تعطیلات کے بعد اسکول دو بارہ کھل گئے

سرینگر //
دس روزہ گرمائی تعطیلات کے بعد کشمیر کے اسکولوں میں تعلیمی سرگرمیاں دوبارہ سے شروع ہو گئی ہیں۔
۸جولائی کو اعلان کردہ اسکولوں کی گرمائی تعطیلات گزشتہ روز یعنی ۱۷جولائی کو ختم ہوئیں جس کے بعد کشمیر صوبے کے سبھی اسکول بشمول صوبہ جموں کے ’ونٹر زون‘ اسکول دوبارہ سے کام کاج لیے کھل گئے ہیں۔
جمرات کی صبح خوشگوار موسم کے درمیان بچوں کو جوش و خروش کے ساتھ اسکولوں کی طرف جاتے ہوئے دیکھا گیا۔ جو اپنے ساتھی طلباء اور اساتذہ کے ساتھ مل رہے تھے۔ بہت سے طلباء نے اسکول واپس آنے پر اپنی خوشی کا اظہار کیا۔
اسکول دوبارہ کھولے جانے سے قبل حکومت نے تمام اداروں کے سربراہان کو ایک جامع صفائی مہم شروع کرنے کی ہدایت دی تھی۔ حکام نے کلاس رومز، بیت الخلا وغیرہ کی مکمل صفائی ستھرائی پر زود دیا تھا تاکہ طلباء کے لیے حفظان صحت کے ماحول کو یقینی بنایا جا سکے۔
ادھر، گزشتہ کئی ہفتوں سے جاری شدید گرمی کے بیچ جمعرات کی صبح سرینگر سمیت کشمیر کے کئی علاقوں میں ہلکی بوندا باندی ہوئی۔ جس سے گرمی کی شدت سے قدر ے راحت نصیب ہوئی۔
واضح رہے کشمیر کے اسکولوں میں۸ جولائی کو ۱۰ روز گرمائی تعطیلات کا اعلان کیا تھا جو گزشتہ روز بدھ کو یعنی ۱۷ جولائی کو اختتام ہوئی۔
دریں اثنا یونیورسٹی آف کشمیر نے جمعرات کو اپنے مرکزی اور سیٹلائٹ کیمپس کیلئے موسم گرما کی تعطیلات کا اعلان کیا ہے۔
اکیڈمک افیئرز کے جوائنٹ ڈائریکٹر نے کہا کہ کیمپس ۲۵جولائی سے۳؍ اگست تک تعطیلات رکھیں گے۔حکم نامے میں کہا گیا ہے کہ یونیورسٹی کے تمام تدریسی شعبہ جات اور اس کے سیٹلائٹ کیمپس ۲۵ جولائی۲۰۲۴ سے ۳؍اگست ۲۰۲۴ تک موسم گرما کی تعطیلات منائیں گے۔
یونیورسٹی کے عہدیدار نے کہا کہ محکمانہ دفاتر معمول کے مطابق کام کریں گے اور محکموں، کیمپسوں اور مراکز کے سربراہان، ڈائریکٹرز، کوآرڈینیٹرز اس بات کو یقینی بنائیں گے کہ امتحانات اور دیگر انتظامی سرگرمیاں شیڈول کے مطابق ہوں۔