چنارکور کے کمانڈر کا کیرن میں اگلی چوکیوں کا دورہ

سرینگر//
فوج کی پندرہویں کمان کے کمانڈر لیفٹیننٹ جنرل راجیو گھائی نے منگل کے روز کیرن میں لائن آف کنٹرول پر اگلی چوکیوں کا دورہ کیا۔
دفاعی ذرائع نے بتایا کہ منگل کے روز کور کمانڈر نے ایل او سی کا دورہ کیا اور وہاں پر فوج کی آپریشنل تیاریوں کا جائزہ لیا۔
ذرائع نے کہا کہ لیفٹیننٹ جنرل راجیو گھائی نے سیکورٹی صورتحال کا جائزہ لینے کیلئے ایل او سی پراگلی چوکیوں کا دورہ کیا اور وہاں پر تعینات جوانوں سے بات چیت کی۔
اس موقع پر گراؤنڈ پر تعینات آفیسران نے آپریشنل تیاریوں اور تازہ سیکورٹی صورتحال سے متعلق کور کمانڈر کو بریف کیا۔
کور کمانڈر نے اس موقع پر کیرن سیکٹری میں دراندازی کی ایک کوشش کو ناکام بنانے کے دوران تین ملی ٹینٹوں کی ہلاکت کو بڑی کامیابی سے تعبیر کیا ہے ۔
اس سے قبل کور کمانڈر کو فوج کے سینئر آفیسران نے لائن آف کنٹرول کی صورتحال کے بارے میں بریفنگ دی ۔
کور کمانڈر کو مخالفین کے چیلنجز کا مقابلہ کرنے کیلئے کئے جانے والے اقدامات کے بارے میں بھی آگاہی فراہم کی گئی ۔
واضح رہے کہ اتوار کو فوج نے کیرن سیکٹری میں دراندازی کی ایک کوشش کو ناکام بنانے کے دوران تین عدم شناخت ملی ٹینٹوں کو مار گرانے کا دعویٰ کیا تھا۔