آئی سی سی چیمپئنز ٹرافی کیلئے بھارتی ٹیم پاکستان آئے گی، وسیم اکرم پُرامید

لاہور//
پاکستان کرکٹ ٹیم کے سابق کپتان وسیم اکرم آئی سی سی چیمپئنز ٹرافی کے سلسلے میں بھارتی کرکٹ ٹیم کے پاکستان آنے کےلیے پرامید ہیں۔
وسیم اکرم کا کہنا تھا کہ پورا پاکستان بھارتی ٹیم کا منتظر ہے، مجھے امید ہے کہ بھارتی کرکٹ ٹیم چیمپئنز ٹرافی کےلیے پاکستان آئے۔
سوئنگ کے سلطان نے کہا کہ پاکستان میں تمام ٹیموں کا شاندار استقبال ہوگا اور چیمپئنز ٹرافی میں کرکٹ بھی بہت اچھی ہوگی۔
وسیم اکرم کا کہنا تھا کہ چیمپئنز ٹرافی کے لیے سہولیات بہت اچھی ہیں، اچھے اسٹیڈیم تیار ہو رہے ہیں۔
انہوں نے کہا کہ چیئرمین پی سی بی محسن نقوی نے اسٹیڈیمز کی تعمیر کا آغاز کر دیا ہے۔ میں سمجھتا ہوں کہ یہ ایک بڑا اچھا ٹورنامنٹ ہوگا اور پاکستان کےلیے یہ ٹورنامنٹ کرکٹ کی بہتری کےلیے بہت ضروری ہے۔
سابق کپتان کا کہنا تھا کہ مجھے امید ہے کہ تمام ٹیمیں چیمپئنز ٹرافی کےلیے پاکستان کا دورہ کریں۔
انہوں نے یہ بھی کہا کہ کرکٹ اور سیاست کو الگ الگ رکھنا چاہیے، میں تمام ٹیمز، فینز اور میڈیا کے نمائندوں سے کہوں گا کہ وہ آئیں اور دیکھیں کہ یہاں کتنی اچھی سہولیات ہیں۔