سرینگر//
سابق وزیر بشارت بخاری نے آج پانچ برس بعد پیپلز ڈیموکرٹیک پارٹی (پی ڈی پی) میں واپسی کی۔
بخاری کو پی ڈی پی نے دسمبر ۲۰۱۸ میں پارٹی مخالف سرگرمیاں انجام دینے پر پارٹی بدر کیا تھا۔
گزشتہ پانچ برسوں کے دوران بخاری نے تین پارٹیاں بدلیں۔ پی ڈی پی سے بے دخل ہونے کے بعد انہوں نے نیشنل کانفرنس کا ہاتھ تھاما۔ دو برس اور تین ماہ میں این سی میں رہنے کے بعد انہوں نے سنہ ۲۰۲۱ میں اس پارٹی سے استعفیٰ دے کر سجاد لون کی پیپلز کانفرنس (پی سی) میںشمولیت اختیار کی
پیپلز کانفرنس نے بھی ان کو پارٹی مخالف سرگرمیاں انجام دینے پر جون ۲۰۲۳ میں نکالا تھا۔ گزشتہ ایک برس سے وہ پی ڈی پی میں شامل ہونے کیلئے کوشاں تھے۔ بشارت بخاری نے گزشتہ روز پی ڈی پی صدر محبوبہ مفتی سے ملاقات کی اور آج انہوں نے اس پارٹی میں رسمی طور شمولیت اختیار کی۔ تاہم انکی واپسی کی تقریب پر محبوبہ مفتی موجود نہیں تھیں۔
اس تقریب میں پی ڈی پی کے نائب صدر عبدالرحمان ویری، پی ڈی پی کے جنرل سیکریٹری غلام نبی لون اور جنرل سیکریٹری آرگنائزیشن محبوبہ بیگ موجود تھے۔ بشارت بخاری کو پی ڈی پی لیڈران نے کوئی مالا بھی نہیں پہنائی۔
بشارت بخاری، ضلع بارہمولہ کے کریری گاؤں کے رہنے والے ہیں۔ سیاست سے قبل وہ آل انڈیا ریڈیو میں ایک انونسر کی حیثیت سے ملازم تھے۔ انہوں نے ۲۰۰۸؍ اور ۲۰۱۴ میں سنگرامہ اسمبلی حلقے سے انتخابات جیتے تھے۔
