کانپور، //) ہندوستان اور بنگلہ دیش کے درمیان 27 ستمبر سے یہاں کھیلے جانے والے ٹیسٹ میچ کے لیے تاریخی گرین پارک اسٹیڈیم میں تیاریاں شروع کر دی گئی ہیں۔
اتر پردیش کرکٹ ایسوسی ایشن (یوپی سی اے) کے صدر ندھی پتی سنگھانیہ تیاریوں کا جائزہ لینے کے لیے جولائی کے پہلے ہفتے میں گرین پارک کا معائنہ کریں گے۔ صدر منتخب ہونے کے بعد گرین پارک گراؤنڈ کا یہ ان کا پہلا دورہ ہوگا۔
ذرائع نے بتایا کہ گرین پارک اسٹیڈیم میں ہندوستان اور بنگلہ دیش کے درمیان 27 ستمبر سے ہونے والے ٹیسٹ میچ کا اعلان کیا گیا ہے۔ اس کے بعد سے تیاریاں شروع کر دی گئی ہیں اور اتر پردیش کرکٹ ایسوسی ایشن کے صدر اس کا جائزہ لینے کے لیے کانپور کے گرین پارک اسٹیڈیم پہنچیں گے۔
گرین پارک اسٹیڈیم ملک کا واحد اسٹیڈیم ہے جہاں پہلے طلبہ کی گیلری ہوا کرتی تھی اور 15 سے 20 ہزار تماشائی ایک ساتھ بیٹھ کر میچ سے لطف اندوز ہوتے تھے۔ 2009 میں گرین پارک اسٹیڈیم میں ڈائریکٹرز اور وی آئی پی پویلین کی تعمیر کے بعد، وہ گیلری بند کر دی گئی تھی، نیز تماشائیوں کی گنجائش بھی کم ہو گئی تھی۔ ایسوسی ایشن کے سابق صدر آنجہانی یدوپتی سنگھانیہ نے حکومت سے کئی بار اسٹوڈنٹ گیلری کے جمود کو برقرار رکھنے کے لیے درخواست دی تو پبلک گیلری کے کچھ حصے کو وہ شکل فراہم کردی گئی تھی۔
ذرائع نے بتایا کہ صدر ندھی پتی سنگھانیہ گراؤنڈ اور پویلین کے علاوہ میڈیا سینٹر وغیرہ علاقوں کا معائنہ کریں گے اور کمیوں کو دور کرنے کی ہدایات جاری کریں گے۔ اس بارے میں یو پی سی اے کے ایک عہدیدار نے بتایا کہ ایسوسی ایشن کے صدر نے ابھی زبانی طور پر ٹیسٹ میچ کی تیاریاں شروع کرنے کی ہدایات دی ہیں وہ جلد ہی ٹیسٹ میچ کی تیاریوں کا جائزہ لینے گرین پارک پہنچیں گے۔
