سرینگر/ 30 مئی
محکمہ موسمیات کی پیش گوئی کے عین مطابق وادی کشمیر میں گرچہ لوگوں کو جھلستی گرمی سے کسی حد راحت نصیب ہوئی ہے تاہم صوبہ جموں میں اگلے ایک ہفتے کے دوران گرمی کا زور جاری رہنے کا امکان ہے ۔
متعلقہ محکمے کے ایک ترجمان نے بتایا کہ وادی میں 31 مئی تک موسم جزوی ابر آلود رہ سکتا ہے اور اس دوران کئی مقامات پر گرج چمک کے ساتھ ہلکی بارشیں متوقع ہیں اور تیز ہوائیں بھی چل سکتی ہیں۔انہوں نے کہا کہ وادی میں یکم اور 2 جون کو بھی موسم جزوی یا کلی طور پر ابر آلود رہنے کے ساتھ کہیں کہیں ہلکی بارشوں کا امکان ہے جبکہ 3 اور 4 جون کو موسم خشک رہنے کی توقع ہے ۔
ترجمان کا کہنا تھا کہ وادی میں 5 سے 7 جون تک موسم ایک بار پر پھر ابر آلود رہنے کا امکان ہے اور اس دوران کہیں کہیں گرج چمک کے ساتھ ہلکی بارشوں کا امکان ہے ۔
ترجمان نے بتایا کہ صوبہ جموں کے میدانی علاقوں میں اگلے 7 دنوں تک گرمی زور تھم جانے کا کوئی امکان نہیں ہے ۔انہوں نے کہا کہ تاہم 2 جون تک کشمیر اور صوبہ جموں کے پہاڑی علاقوں میں لوگوں کو گرمی سے کسی حد تک راحت نصیب ہوسکتی ہے ۔انہوں نے کہا کہ کشمیر میں 3 اور 4 جون کو ایک اور ہیٹ ویو متوقع ہے ۔
محکمے نے لوگوں خاص طور پر مریضوں، عمر رسیدہ فراد اور بچوں کو گرمی سے بچنے اور اس دوران زیادہ سے زیادہ پانی پینے کی تاکید کی ہے ۔
دریں اثنا وادی میں شبانہ درجہ حرارت کہیں معمول سے زیادہ تو کہیں معمول سے کم ریکارڈ ہوا ہے ۔
سری نگر میں کم سے کم درجہ حرارت13.8 ڈگری سینٹی گریڈ ریکارڈ کیا گیا جو معمول سے 1.8 ڈگری سینٹی گریڈ زیادہ ریکارڈ ہوا تھا۔
سیاحتی مقام گلمرگ میں کم سے کم درجہ حرارت6.5 ڈگری سینٹی گریڈ ریکارڈ کیا گیا جو معمول سے 0.6 ڈگری سینٹی گریڈ کم ریکارڈ ہوا تھا۔
ایک اور سیاحتی مقام پہلگام میں کم سے کم درجہ حرارت9.7 ڈگری سینٹی گریڈ ریکارڈ کیا گیا جو معمول سے 3.6 ڈگری سینٹی گریڈ زیادہ ریکارڈ ہوا تھا۔
شمالی ضلع کپوارہ میں کم سے کم درجہ حرارت10.2 ڈگری سینٹی گریڈ ریکارڈ کیا گیا جو معمول سے 0.4 ڈگری سینٹی گریڈ کم ریکارڈ ہوا تھا۔
قصبہ قاضی گنڈ میں کم سے کم درجہ حرارت12.4 ڈگری سینٹی گریڈ ریکارڈ کیا گیا جو معمول سے 1.7 ڈگری سینٹی گریڈ کم ریکارڈ ہوا تھا۔
