رائے دہندگان کو پولرائز کرنے کی کوششیں ہو رہی ہیں لیکن لوگ چھٹے شیڈول کے مطالبے پر قائم

لیہہ//
’’لداخ میں رائے دہندگان کو پولرائز کرنے کی کوشش کی جارہی ہے لیکن وہ ریاست کا درجہ دینے اور آئین کے چھٹے شیڈول کو نافذ کرنے کے اپنے مطالبے سے پیچھے نہیں ہٹیں گے‘‘۔
انجمن امامیہ کے سربراہ‘اشرف علی برچا نے کہا کہ لداخ کے عوام کا چار نکاتی ایجنڈا جس میں لداخ کے لئے پبلک سروس کمیشن اور لیہہ اور کارگل اضلاع کے لئے الگ الگ لوک سبھا نشستیں بھی شامل ہیں ، توجہ کا مرکز بنے ہوئے ہیں کیونکہ مرکز کے زیر انتظام علاقے میں ۲۰مئی کو انتخابات ہونے والے ہیں۔ آئین کا چھٹا شیڈول مقامی لوگوں کے لئے زمین اور ملازمتوں کی ضمانت دیتا ہے۔
براچا لیہہ اپیکس باڈی کے رکن بھی ہیں، جو کرگل ڈیموکریٹک الائنس کے ساتھ مل کر لداخ کو ریاست کا درجہ دینے اور اسے چھٹے شیڈول میں شامل کرنے کے مطالبے کے لیے تحریک چلا رہی ہے۔ یہ تنظیمیں مرکزی وزارت داخلہ کے ساتھ بات چیت کا حصہ رہی ہیں۔
لداخ کی واحد لوک سبھا سیٹ کیلئے کانگریس کے شیرنگ نامگیال اور بی جے پی کے تاشی گیالسن میدان میں ہیں جو دونوں لیہہ سے ہیں اور کرگل سے آزاد امیدوار حاجی حنیفہ جان میدان میں ہیں۔
۲۰۱۹ میں آرٹیکل ۳۷۰کی منسوخی کے بعد لداخ کے مرکز کے زیر انتظام علاقے میں منتقلی نے خطے میں مختلف رد عمل کو جنم دیا ہے۔ لیہہ میں جہاں جشن منایا گیا وہیں کرگل میں علاقائی تنظیم نو پر عدم اطمینان کا اظہار کرتے ہوئے متضاد جذبات دیکھے گئے۔ لیہہ بدھ مت کی اکثریت والا ضلع ہے جبکہ کرگل میں شیعہ مسلمانوں کی اکثریت ہے۔
حالانکہ براچا نے دعویٰ کیا کہ پولرائزیشن پیدا کرنے کی کوشش کی جا رہی ہے، لیکن انہوں نے کسی پارٹی یا فرد کا نام نہیں لیا۔انہوں نے کہا’’سیاسی جماعتیں صورتحال کا فائدہ اٹھانے کی کوشش کر سکتی ہیں، لیکن لوگ دیکھ رہے ہیں کہ ہمارا مسئلہ کون اٹھا رہا ہے‘‘۔
انجمن امامیہ کے سربراہ کاکہنا ہے ’’لیہہ کے لوگ کرگل کو ووٹ دے سکتے ہیں اور کرگل کے لوگ لیہہ کو ووٹ دے سکتے ہیں۔ کچھ پارٹیاں پولرائزیشن پیدا کرنے کی کوشش کر رہی ہیں لیکن مجھے نہیں لگتا کہ لوگ اس کے حق میں جائیں گے۔ لوگ اپنے مسائل سے انحراف نہیں کریں گے‘‘۔
براچا نے اس بات کی بھی نشاندہی کی کہ کانگریس کے منشور میں چھٹے شیڈول کو نافذ کرنے کا وعدہ کیا گیا ہے اور کرگل سے آزاد امیدوار جان بھی بی جے پی کو مورد الزام ٹھہراتے ہوئے ان مسائل کو اٹھا رہے ہیں۔انہوں نے کہا’’تصویر واضح ہے کہ لوگ کیا چاہتے ہیں‘‘۔
انجمن امامیہ کے سربراہ نے کہا کہ لداخ کی تمام برادریاں چار نکاتی مطالبے پر متحد ہیں اور اس بات پر زور دیا کہ حکومت کو علاقے کے لوگوں کی خواہشات کو نظر انداز نہیں کرنا چاہئے۔’’لداخ کی سرحدیں پاکستان اور چین دونوں کے ساتھ ملتی ہیں’’۔
ان کامزید کہنا تھا’’ہم نے حکومت پر زور دیا کہ وہ ہمیں تحفظ فراہم کرے۔ ہم ماحول کو بچانا چاہتے ہیں، نوجوانوں کو روزگار فراہم کرنا چاہتے ہیں۔ یہ ایک سرحدی علاقہ ہے، اگر لوگ ناخوش ہیں، تو یہ بھی سیکورٹی کی تشویش ہوگی‘‘۔
براچا نے کہا’’اب تک، تمام جنگوں میں، مقامی لوگ فورسز کے ساتھ کھڑے رہے ہیں۔ ہم نہ تو چین چاہتے ہیں اور نہ ہی پاکستان، چاہے بدھ مت کے پیروکار ہوں یا مسلمان، ہندوستان ہمارا ملک ہے اور یہ ہمارے ڈی این اے میں ہے کہ ہمیں فوج کے ساتھ مل کر اس علاقے کی حفاظت کرنی ہے‘‘۔
انجمن امامیہ کے سربراہ نے کہا’’اگر یہ بغیر کسی حفاظت کے یو ٹی ہے، تو کوئی بھی آئے گا، اور ہماری اقدار، جو ملک کے مفاد میں بھی ہیں، کو تباہ کر دیا جائے گا۔ بیرونی لوگوں کو یہ بھی معلوم نہیں ہوگا کہ سرحد کہاں ہے‘‘۔
لداخ رقبے کے لحاظ سے ہندوستان کا سب سے بڑا انتخابی حلقہ ہونے کا اعزاز رکھتا ہے۔ یہ لوک سبھا انتخابات کے پانچویں مرحلے میں ووٹ ڈالے جائیں گے۔