بی جے پی ڈیڑھ سو پار بھی نہیں کرے گی، انڈیا الائنس حکومت بنائے گی: وقار رسول وانی

سرینگر/۹مئی
جموںکشمیر پردیش کانگریس کمیٹی کے صدر وقار رسول وانی کا دعویٰ ہے کہ رواں لوک سبھا الیکشن میں بی جے پی ڈیڑھ سو پار بھی نہیں کرے گی۔
وانی نے ساتھ ہی کہا کہ انڈیا الائنس چار جون کو ملک میں حکومت بنائے گی۔
کانگریسی یونٹ صدر نے ان باتوں کا اظہار جمعرات کو یہاں پارٹی ہیڈ کوارٹر پر ایک پریس کانفرنس سے خطاب کے دوران کیا۔
وانی نے کہا”کانگریس پارٹی کشمیر میں تینوں سیٹوں پر نیشنل کانفرنس کو سپورٹ کر رہی ہے اور ضمیر احمد بھی اس سیٹ پر عمر عبداللہ کے لئے مہم چلائیں گے “۔
کانگریسی لیڈر کا کہنا تھا”جموں کی دونوں سیٹوں پر کانگریس جیت حاصل کرے گی اور کشمیر کی بھی تینوں سیٹوں پر نیشنل کانفرنس کامیابی حاصل کرے گی“۔
وانی نے کہا”وزیر اعظم ہندو مسلم اور منگل سوترا کی باتیں کر رہے ہیں اور عجیب بات یہ ہے کہ جو لوگ بی جے پی کے حامی تھے اور جن کو بڑے بڑے ٹھیکے دئے گئے آج ان کو کہا جاتا کہ انہوں نے کانگریس کو ٹیمپو میں پیسے دئے “۔
وقار رسول نے کہا کہ ان باتوں سے ظاہر ہے کہ بی جے پی ڈیڑھ سو پار بھی نہیں کرے گی اور چار جون کو انڈیا الائنس حکومت بنائے گی۔انہوں نے کہا”انڈیا الائنس کی حکومت بنتے ہی جموں وکشمیر کا ریاستی درجہ بحال کیا جائے گا“۔
کانگریسی یونٹ صدر کا کہنا تھا”یہاں جو لوگوں کو مسائل و مشکلات ہیں جیسے بے روز گاری، تعمیر و ترقی کے مسائل ہیں ان کو دور کیا جائے گا اور سمارٹ میٹر کو پھینکا جائے گا“۔
وانی نے کہا کہ سٹیٹ سبجکیٹ کے تحفظ کو یقینی بنایا جائے گا۔