دس ہزار روپے کی رشوت :اے سی بی نائب تحصیلدار کو دھرلیا

سرینگر/۷ مئی
اینٹی کرپشن بیورو(اے سی بی) نے نائب تحصیلدار کھریوکو رشوت لیتے ہوئے گرفتار کیا ۔
اے سی بی کے ایک ترجمان نے کہا کہ جموں کشمیر اینٹی کرپشن بیورو کو نائب تحصیلدار، کھریو، ضلع پلوامہ کے خلاف ایک شکایت موصول ہوئی تھی جس میں الزام لگایا گیا تھا کہ مذکورہ نائب تحصیلدار اپنے کلرک‘ اعجاز احمد کے ذریعے شکایت کنندہ سے دس ہزار روپے کا مطالبہ کر رہا ہے تاکہ گاؤں ستپوکھران، کھریو میں آبائی زمین کے تنازعہ کو حل کیا جا سکے۔
شکایت کنندہ نے تنازعہ کے تصفیہ کے لیے کئی بار تحصیل آفس کھریو سے رجوع کیا، لیکن نائب تحصیلدار باز نہیں آئے۔ مزید برآں شکایت کنندہ کو مذکورہ نائب تحصیلدار کی طرف سے نوٹسز کے ذریعے ہراساں کیا گیا۔
شکایت کنندہ نے مذکورہ نائب تحصیلدار اور اس کے کلرک اعزاز احمد کے خلاف ضروری کارروائی کے لیے اے سی بی سے رجوع کیا۔ شکایت کی وصولی پر، ایف آئی آر پی ایس اے سی بی اننت ناگ میں مقدمہ درج کیا گیا اور تحقیقات شروع کی گئی۔تفتیش کے دوران ٹریپ ٹیم تشکیل دی گئی۔ ٹیم نے ایک کامیاب جال بچھا کر ملزم مقبول حسین ڈار سکنہ نوری پور، پٹن اس وقت نائب تحصیلدار، کھریو، ضلع پلوامہ کو شکایت کنندہ اور ایس جی کانسٹیبل سے دس ہزار روپے رشوت طلب کرتے ہوئے رنگے ہاتھوں پکڑ لیا۔
بیان میں کہا گیا ہے کہ نائب تحصیلدار کے ساتھ منسلک کو بھی جرم کی سہولت فراہم کرنے کے الزام میں گرفتار کیا گیا تھا، بیان میں کہا گیا ہے کہ کیس کی مزید تفتیش جاری ہے۔