شوپیاں میں غیر مقامی ڈرائیور پر ہوئے حملے میں جنگجو معاون گرفتار

سرینگر//
جموںکشمیر پولیس کا کہنا ہے کہ اس نے جنوبی کشمیر کے ضلع شوپیاں میں گذشتہ ماہ ایک غیر مقامی ٹیکسی ڈرائیور پر ہوئے حملے کی تحقیقات کے دوران ایک جنگجو معاون کو گرفتار کیا ہے ۔
بتادیں کہ شوپیاں کے پد پاوان گائوں میں۹ اپریل کو مشتبہ جنگجوئوں کے حملے میں دہلی سے تعلق رکھنے والا پرم جیت سنگھ نامی ایک ٹیکسی ڈرائیور زخمی ہوا تھا۔
یہ واقعہ تاریخی مغل روڈ پر واقع ہیر پورہ علاقے میں دانش رزوٹ پر پیش آیا تھا۔
شوپیاں پولیس نے ’ایکس‘پر ایک پوسٹ کے ذریعے جانکاری فراہم کرتے ہوئے کہا’’پد پاوان گائوں میں دانش رزوٹ حملہ کیس کی تحقیقات کے سلسلے میں شوپیاں پولیس، فوج کی۴۴راشٹریہ رائفلز اور سی آر پی ایف کی۱۴بٹالین کی ایک مشترکہ ٹیم نے اہم پیش رفت کی ہے ‘‘۔
پولیس نے کہا کہ اس سلسلے میں چھوٹی پورہ علاقے میں ایک جنگجو معاون کو گرفتار کیا گیا اور اے۴۷کی۶گولیاں اور۲سیل فون بر آمد کئے گئے ۔