یقین کریں کہ ہماری سمجھ میں کچھ نہیں آرہا ہے… بالکل بھی آرہا ہے۔ وہ سب نہیں آرہا ہے جو اننت ناگ پونچھ راجوری لوک سبھا حلقے کے حوالے سے کہا جا رہا ہے… یہ کہا جارہا ہے کہ کچھ ایک سیاسی جماعتوں یا امیدواروں نے الیکشن کمیشن کو لکھا ہے… یہ لکھا ہے کہ وہ اس حلقے میں الیکشن کو موخر کیا جائے اور… اور اس لئے کیا جائے کیونکہ مغل روڈ برفباری کی وجہ سے بند رہتا ہے… ہماری سمجھ میں یہ نہیں آرہا ہے کہ اس حلقے میں الیکشن کا مغل روڈ کے ساتھ کیا تعلق ہے… ہماری سمجھ میں یہ بالکل بھی نہیں آرہا ہے اور… اور اس لئے نہیں آ رہا ہے کہ اگر مغل روڈ بند بھی ہو جائیگا… یا اگر یہ شاہراہ بند ہے تو… تو بھی اس کا پولنگ کے ساتھ کیا تعلق ہے… کیا پونچھ اور راجوری کے ووٹروں کو اننت ناگ اور اننت ناگ کے ووٹروں کوپونچھ اور راجوری ووٹ ڈالنے کیلئے آنا یا جانا ہے اور… اور اس آنے جانے کیلئے کیا مغل روڈ واحد رابطہ سڑک ہے ؟ہماری سمجھ میں یہ نہیں آرہا ہے… اسی طرح جس طرح ہم یہ سمجھنے سے قاصر ہیں کہ آخر حد بندی کمیشن نے کیا سوچ کر اننت ناگ کی سیٹ کے ساتھ پونچھ راجوری کو ملایا… یہ بات ہماری سمجھ میں نہیں آرہی ہے… اسی طرح ہم یہ بھی سمجھنے سے قاصر ہیں کہ الیکشن کمیشن نے اس ضمن میں ایک عدد خط کیوں جاری کیا ہے جس میں یو ٹی کی انتظامیہ سے رپورٹ طلب کی ہے … کمیشن نے جب اس حلقے کیلئے الیکشن کی تاریخ کا اعلان کیا تھا تو… تو اس وقت کیا وہ اس بات سے باخبر نہیں تھا کہ آیا موسم/ یا برفباری کی وجہ سے اس حلقے میں ووٹنگ متاثر تو نہیں ہو گی… یقینا کمیشن اور باتوں کے علاوہ ووٹنگ کی تاریخوں کو طے کرنے سے پہلے موسم کو بھی دھیان میں رکھتا ہے اور… اور سو فیصد رکھتا ہے… پھر آج کمیشن جموں کشمیر کی انتظامیہ سے موسم اور رابطہ سڑکوں کی حالت کے بارے میں رپورٹ طلب کیوںکررہا ہے …یقین کریں کہ ہماری سمجھ میں کچھ نہیں آرہا ہے اور… اور اس لئے بھی نہیں آرہا ہے کہ الیکشن موخر کرنے کا مطالبہ وہ جماعتیں بھی کررہی ہیں جو جماعتیں اننت ناگ حلقے میں الیکشن لڑ ہی نہیں رہی ہیں… بالکل بھی نہیں لڑ رہی ہیں…لیکن اب لڑنا چاہتی ہیں ۔ ہے نا؟
