۱۰سال میں کیا کام صرف ایک ٹریلر، ابھی بہت کچھ ہونا باقی ہے:وزیر اعظم مودی

جئے پور//
وزیر اعظم نریندر مودی نے گزشتہ ۱۰سالوں میں اپنی حکومت کے ذریعہ کئے گئے کاموں کو اجاگر کرتے ہوئے جمعہ کو کہا کہ یہ صرف ایک ٹریلر ہے اور ابھی بہت کچھ آنا باقی ہے۔
وہ لوک سبھا انتخابات سے قبل راجستھان کے چورو میں ایک انتخابی ریلی سے خطاب کر رہے تھے۔
مودی نے کہا’’اس سے کوئی فرق نہیں پڑتا کہ کتنا ہی کام ہوا ہے، اب تک جو کچھ بھی ہوا ہے وہ ایک ٹریلر ہے۔ مودی نے اب تک جو کچھ کیا ہے، وہ محض ایک خوش آئند کام تھا اور اصل راستہ ابھی باقی ہے‘‘۔
وزیر اعظم نے کہا’’ابھی بہت کچھ کرنا باقی ہے… بہت سارے خواب ہیں۔ ہمیں ملک کو بہت آگے لے جانا ہے‘‘۔
مودی نے اپنے خطاب میں کانگریس پر بھی حملہ کرتے ہوئے کہا کہ پارٹی فوج کی توہین کرنے اور ملک کو تقسیم کرنے کیلئے جانی جاتی ہے۔
طلاق ثلاثہ سے متعلق قانون کا حوالہ دیتے ہوئے مودی نے کہا کہ اس نے نہ صرف مسلم بہنوں بلکہ تمام مسلم خاندانوں کی زندگیاں بچائی ہیں۔
وزیر اعظم نے مزید کہا کہ کانگریس اور اپوزیشن انڈیا بلاک کے اپنے مفادات ہیں اور ان کا غریبوں، دلتوں اور پسماندہ لوگوں کی فلاح و بہبود اور احترام سے کوئی لینا دینا نہیں ہے۔ (ایجنسیاں)