’پی ڈی پی اننت ناگ حلقے سے اپنا امیدوار کھڑاکرتی نظر نہیں آرہی ہے‘

سرینگر/۲؍اپریل
نیشنل کانفرنس کے نائب صدر عمر عبداللہ نے منگل کو کہا کہ پیپلز ڈیموکریٹک پارٹی(پی ڈی پی) وادی کشمیر میں ان کی پارٹی کے خلاف امیدوار کھڑے نہیں کر یگی اور دونوں پارٹیاں انڈیا اتحاد کا اٹوٹ حصہ ہیں۔
عمر عبداللہ نے نامہ نگاروں سے بات کرتے ہوئے کہا کہ پی ڈی پی صدر محبوبہ مفتی نے نیشنل کانفرنس کے خلاف امیدوار کھڑے کرنے کا کوئی ارادہ ظاہر نہیں کیا ہے۔
این سی نائب صدر نے دہلی میں انڈیا بلاک کی ایک حالیہ ریلی کا حوالہ دیا ، جہاں محبوبہ مفتی نے نیشنل کانفرنس کے صدر ڈاکٹر فاروق عبداللہ کے ساتھ اسٹیج شیئر کیا اور اتحاد کے لئے پی ڈی پی کے عزم کا اعادہ کیا۔ عمرنے میڈیا پر بھی زور دیا کہ وہ دونوں جماعتوں کے درمیان اختلافات کو فروغ نہ دے۔
سابق وزیر اعلیٰ نے کشمیر میں نئے اتحاد کے ابھرنے پر تنقید کرتے ہوئے الزام لگایا کہ یہ جماعتیں بی جے پی کے اشارے پر کام کر رہی ہیں اور جموں و کشمیر میں اس کے پراکسی کے طور پر انتخابات لڑیں گی۔
آرٹیکل۳۷۰پرعمر عبداللہ نے اپنے موقف کا اعادہ کرتے ہوئے کہا کہ یہ ایک سنگین غلطی تھی جس نے جموں و کشمیر کے لوگوں کو ان کے حقوق سے محروم کردیا۔ انہوں نے دہلی کے وزیر اعلی اروند کیجریوال کی گرفتاری کی بھی مذمت کی اور کہا کہ وہ بی جے پی کی ناقص پالیسیوں کا شکار رہے ہیں۔
نیشنل کانفرنس کے نائب صدر کا کہنا تھا کہ لوک سبھا انتخابات سے پہلے اپوزیشن لیڈروں کو نشانہ بنانا ملک کی جمہوریت کے لئے ایک خطرناک صورتحال ہے ۔
عمر نے کہا’’دنیا کے طاقتور ملکوں نے بھی نوٹس کیا ہے کہ الیکشن سے پہلے کس طرح اپوزیشن لیڈروں کو نشانہ بنایا جا رہا ہے ، اروند کیجروال اور دوسرے وزیر اعلیٰ کو حال ہی میں گرفتار کیا گیا‘‘۔ان کا کہنا تھا’’ان کی گرفتاریاں اور اس طرح ایجنسیوں کو استعمال کرنا ملک کی جمہوریت کے لئے خطرناک صورتحال ہے ملک کو اس کا خمیازہ بھگتنا پڑے گا‘‘۔
سابق وزیر اعلیٰ نے کہا’’ہم امید کرتے ہیں کہ عدالت عظمیٰ اور الیکشن کمیشن ان چیزوں کو نظر انداز نہیں کرے گا اور الیکشن کے دوران اس طرح ایجنسیوں کے استعمال پر پابندی لگائی جائے گی‘‘۔
ایک سوال کے جواب میں عمر عبداللہ نے کہا کہ ہمارے قول و فعل میں کوئی تبدیلی نہیں آئی ہے اور نہ ہی ہمارا کوئی فیصلہ بدل گیا ہے ۔
میاں الطاف احمد کے اننت ناگ راجوری پونچھ لوک سبھا سیٹ کے لئے لڑنے کے متعلق پوچھے جانے پر ان کا کہنا تھا’’میاں صاحب کہیں سے بھی لڑ سکتے ہیں‘‘۔انہوں نے کہا کہ میاں صاحب باہر کے نہیں ہیں ۔