سرینگر، جموں قومی شاہراہ پر ٹریفک کی جزوی نقل و حمل بحال

سرینگر//
وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر پیر کے روز ٹریفک کی جزوی نقل و حمل بحال کر دی گئی اور پہلے درماندہ گاڑیوں کو چلنے کی اجازت دی گئی۔
قومی شاہراہ پراتوار کی صبح مرمتی کام کے پیش نظر ٹریفک کی نقل و حمل بند کر دی گئی تھی۔
جموں وکشمیر ٹریفک حکام نے پیر کو بتایا کہ قومی شاہراہ پر ٹریفک کی یک طرفہ نقل و حمل بحال کر دی گئی ہے ۔انہوں نے کہا کہ پہلے قومی شاہراہ پر درماندہ بڑی گاڑیوں (ٹرکوں) کو چلنے کی اجازت ہے ۔انہوں نے لوگوں سے اپیل کی کہ وہ قومی شاہراہ پوری طرح سے بحال ہونے تک اس پر سفر کرنے سے پرہیز کریں۔
قبل ازیں جموں وکشمیر ٹریفک پولیس نے بتایا کہ ڈلواس پر سڑک کی سطح قابل عبور و مرور نہیں ہے اس لئے لوگوں سے اپیل کی جاتی ہے کہ وہ سڑک ٹھیک ہونے تک قومی شاہراہ پر سفر کرنے سے گریز کریں۔
لوگوں سے کہا گیا ہے کہ وہ قومی شاہراہ کی صورتحال معلوم کرنے کیلئے ٹریفک کنٹرول یونٹ رام بن کے ساتھ رابطہ کریں۔
دریں اثنا جنوبی کشمیر کے ضلع شوپیاں کو صوبہ جموں کے راجوری اور پونچھ اضلاع کے ساتھ جوڑنے والئے تاریخی مغل روڈ پر ٹریفک مسلسل بند ہے تاہم اس کو قابل آمد و رفت بنانے کے لئے کام جاری ہے ۔
علاوہ ازی سرینگر، لیہہ شاہراہ، سنتھن ، کشتواڑ، ڈوڈہ، چمبہ، بانڈی پورہ ،گریز روڈ اور کپوارہ، ٹنگڈار روڈ برف جمع ہونے کی وجہ سے بند ہیں۔
قابل ذکر ہے کہ سرینگر، جموں قومی شاہراہ کے بند ہونے سے اہلیان وادی کو گوناگوں مشکلات کا سامنا کرنا پڑتا ہے ۔لوگوں کا کہنا ہے کہ قومی شاہراہ کے بند ہوتے ہی جہاں بازاروں میں اشیائے ضروریہ کی قلت پیدا ہوجاتی ہے وہیں مہنگائی کا زور بھی بڑھ جاتی ہے ۔