ادھم پور میں سڑک حادثہ دو افراد جاں بحق

جموں//
جموںکشمیر کے ادھم پور ضلع کے سالورا علاقے میں موٹر سائیکل کو حادثہ پیش آیا جس کے نتیجے میں دو افراد کی برسر موقع ہی موت واقع ہوئی۔
اطلاعات کے مطابق پیر کی صبح ادھم پور کے سالورا علاقے میں اس وقت سنسنی کا ماحول پھیل گیا جب ایک موٹر سائیکل بجلی پول سے جا ٹکرایا جس کے نتیجے میں موٹر سائیکل پر سوار دو افراد شدید طورپر زخمی ہوئے ۔
معلوم ہوا ہے کہ زخمیوں کو علاج ومعالجہ کی خاطر نزدیکی ہسپتال منتقل کیا گیا تاہم وہاں پر تعینات ڈاکٹروں نے دونوں کو مردہ قرار دیا۔
متوفین کی شناخت ۲۴سالہ سچن ولد اشوک کمار ساکن ادھم پور اور۲۱سالہ رکی ولد بلونت راج سانگھ دھار روڈ ادھم پور کے بطور کی گئی ہے ۔
دریں اثنا پولیس نے حادثے کی وجوہات جاننے کی خاطر کیس درج کرکے تحقیقات شروع کی ہے ۔
اس دوران جموںکشمیر کے ضلع راجوری میں پیر کی صبح ایک عدم شناخت لاش برآمد ہوئی ہے ۔
اطلاعات کے مطابق راجوری کے کھنڈلی پل کے قریب چند مقامی افراد نے ایک شخص کی لاش دیکھی اور اس بارے میں پولیس کو مطلع کیا۔
پولیس ٹیم فوری طورپر جائے موقع پر پہنچی اور لاش کو تحویل میں لے کر اس کی شناخت کے لئے کارروائی شروع کی ہے ۔
پولیس کا کہنا ہے کہ پوسٹ مارٹم رپورٹ موصول ہونے کے بعد موت کی وجوہات کے بارے میں کچھ کہا جاسکتا ہے ۔