کیجریوال کو ای ڈی کا چوتھا سمن

نئی دہلی//) انفورسمنٹ ڈائریکٹوریٹ (ای ڈی) نے دہلی شراب پالیسی معاملے میں دہلی کے وزیر اعلی اروند کیجریوال کو ہفتہ کے روز چوتھی بار سمن بھیج کر 18 جنوری کو پوچھ گچھ کے لیے پیش ہونے کی ہدایت دی۔
عام آدمی پارٹی کے قومی کنوینر مسٹر کیجریوال کو نئی دہلی میں ای ڈی ہیڈکوارٹر بلایا گیا ہے ۔
اس سے قبل ایجنسی کی جانب سے انہیں 3 جنوری، 21 دسمبر اور 2 نومبر 2023 کو ایجنسی کے سامنے پیش ہونے کے لیے سمن جاری کیے گئے تھے ۔ مسٹر کیجریوال ان تین تاریخوں پر بیان دینے نہیں پہنچے ۔
مسٹر کیجریوال کا نام شراب گھوٹالہ معاملے میں ای ڈی کی طرف سے داخل کی گئی چارج شیٹ میں کئی بار آیا ہے ۔ ایجنسی انہیں تحقیقات کے سلسلے میں مسلسل طلب کر رہی ہے ۔ ای ڈی کا کہنا ہے کہ دہلی حکومت کی 2021-22 کی مبینہ طورپر غلط شراب پالیسی تیار کرنے میں مسٹر کیجریوال بھی شامل تھے ۔
سنٹرل بیورو آف انویسٹی گیشن اس کیس کے مجرمانہ پہلو کی جانچ کر رہا ہے ۔ دہلی کے اس وقت کے چیف سکریٹری کی رپورٹ پر لیفٹیننٹ گورنر نے ایکسائز پالیسی کا معاملہ سنٹرل بیورو آف انویسٹی گیشن کو سونپ دیا ہے ۔ اس معاملے میں جرم کی آمدنی کے لانڈرنگ کے پہلو کی جانچ وزارت خزانہ کے تحت کام کرنے والی ایجنسی ای ڈی کررہی ہے ۔
اس معاملے میں دہلی کے اس وقت کے نائب وزیر اعلیٰ اور وزیر خزانہ اور ایکسائز منیش سسودیا اور اے اے پی لیڈر اور ایم پی سنجے سنگھ عدالتی حراست میں جیل میں ہیں۔ الزام ہے کہ ایکسائز پالیسی میں کچھ کمپنیوں کو فائدہ پہنچایا گیا اور اس سے سرکاری خزانے کو بھاری نقصان پہنچا۔ تنازعہ کی وجہ سے کیجریوال حکومت نے اس پالیسی کو واپس لے لیا تھا۔
اے اے پی ذرائع کا کہنا ہے کہ مسٹر کیجریوال لوک سبھا انتخابات کی تیاری کے لیے 18 جنوری سے گوا کے تین روزہ دورے پر ہوں گے ۔