’بی جے پی کی حکومت ہر محاذ پر ناکام ہو ئی ہے‘

جموں//
جموں و کشمیر کانگریس کے کارگزار صدر‘ رمن بھلا نے چہارشنبہ کے روز بی جے پی پر لوگوں کو فرقہ وارانہ خطوط پر تقسیم کرنے اور ملک بھر میں ماحول خراب کرنے کی کوشش کرنے کا الزام عائد کیا۔
بھلا نے بی جے پی پر تمام محاذوں پر ناکام ہونے کا الزام لگایا۔
بھلا نے کہا’’اپنی ناکامیوں سے عوام کی توجہ ہٹانے کیلئے بی جے پی لوگوں کو فرقہ وارانہ خطوط پر تقسیم کرنے کی کوشش کر رہی ہے۔ بی جے پی کی جانب سے عام لوگوں کو فرقہ وارانہ بنیادوں پر تقسیم کرنے کی کوشش کی وجہ سے ملک بھر کا ماحول خراب ہوا ہے‘‘۔
کانگریسی لیڈر نے کہا کہ جموں و کشمیر کی خصوصی حیثیت کے خاتمے کے بعد غریبوں کی زمین چھینی جارہی ہے اور روزگار کا تحفظ ختم کیا جارہا ہے۔
بھلا نے مرکز کی بی جے پی حکومت اور مرکز کے زیر انتظام علاقے کی انتظامیہ پر غریبوں پر اضافی ٹیکس لگانے ، اختلافی آوازوں کو دبانے اور ان کی ناکامیوں سے توجہ ہٹانے کا الزام عائد کیا۔انہوں نے کہا’’جب لوگ اپنی آواز اٹھاتے ہیں، تو ان پر بے بنیاد الزامات کے تحت مقدمہ درج کیا جاتا ہے اور انہیں کچل دیا جاتا ہے‘‘۔
کانگریس لیڈر نے نجی سرمایہ کاری کو فروغ دینے اور نجی شعبے میں بڑے پیمانے پر ملازمتیں پیدا کرنے کے بی جے پی کے دعوے کو تنقید کا نشانہ بنایا۔ ’’یہ وعدے ایک دھوکے سے زیادہ کچھ نہیں تھے‘‘۔
بھلا نے الزام لگایا کہ بی جے پی اپوزیشن رہنماؤں کو مسلسل ہراساں کرنے کیلئے ای ڈی جیسی سرکاری ایجنسیوں کا غلط استعمال کررہی ہے۔ (ایجنسیاں)