کووڈ کیسوں میں اضافہ:لہیہ میں عوامی مقامات پر ماسک پہننا لازمی قرار

سرینگر//
کووڈ۱۹کے بڑھتے ہوئے معاملوں کے درمیان لیہہ ضلع انتظامیہ نے پیر کو کہا کہ لوگوں کیلئے عوامی مقامات پر ماسک پہننا لازمی ہوگا۔
لیہہ میں گزشتہ ہفتے کووڈ ۱۹کے ۱۱معاملے درج کیے گئے تھے۔
حکام نے کہا کہ ضلع میں کووڈ ۱۹ کے بڑھتے ہوئے معاملوں کے پیش نظر کووڈ۱۹ کے پھیلاؤ کو روکنے کے لئے احتیاطی اقدامات کئے گئے ہیں۔ اس پر سختی سے عمل کرنے کا حکم دیا گیا ہے۔
ڈسٹرکٹ ڈیزاسٹر مینجمنٹ اتھارٹی کے سی ای او سنتوش سکھدیو نے ایک سرکاری حکم میں کہا’’لوگوں کو دفتروں‘کام کی جگہوں اور عوامی مقامات بشمول پبلک ٹرانسپورٹ میں فیس ماسک پہننا لازمی طور پر یقینی بنانا ہوگا‘‘۔
حکم میں لوگوں سے یہ بھی کہا گیا ہے کہ وہ دفاتر اور عوامی مقامات پر سماجی دوری برقرار رکھیں۔ ’’عام لوگوں کو غیر ضروری اجتماع اور بھیڑ بھاڑ والی جگہوں پر جانے سے گریز کرنا چاہئے۔ لیہہ ضلع کے تمام محکمہ جات کے سربراہان اور تمام سب ڈویڑنل مجسٹریٹ اس حکم کی تعمیل کو یقینی بنائیں گے۔ ‘‘