۵ روزہ سرینگر تھیٹر فیسٹیول ۲۰۲۳ کا آغاز۶نومبر سے ہوگا:این ایس ڈی

سرینگر//
نیشنل اسکول آف ڈرامہ (این ایس ڈی) ریپرٹری کمپنی جموں و کشمیر اکیڈمی آف آرٹ، کلچر اینڈ لینگویجز کے اشتراک سے سرینگر میں ۶سے۱۰ نومبرتک ’سرینگر تھیٹر فیسٹیول۲۰۲۳‘کا انعقاد کر رہی ہے۔
این ایس ڈی ریپرٹری کمپنی سرینگر شہر میں پہلی بار اپنا ڈرامہ پیش کرے گی۔اس سے قبل جون اور جولائی کے مہینوں میں این ایس ڈی ریپرٹری کمپنی نے اڈیسہ اور دہلی کے مختلف مقامات پر سمر تھیٹر فیسٹیول ۲۰۲۳کا انعقاد کیا تھا، جس دوران فیسٹیول کے مختلف حصوں کے ذریعے تقریبا ایک لاکھ چالیس ہزار لوگوں تک رسائی حاصل کی گئی تھی۔
کمپنی این ایس ڈی اور دیگر تھیٹر اسکولوں کے گریجویٹس کے ساتھ ساتھ ہندوستان کے تجربہ کار تھیٹر اداکاروں کیلئے ایک پیشہ ورانہ پلیٹ فارم فراہم کررہی ہے۔
نیشنل اسکول آف ڈراما کی ریپرٹری کمپنی کے سربراہ‘ راجیش سنگھ نے’ سرینگر تھیٹر فیسٹیول۲۰۲۳‘ کا جائزہ پیش کرتے ہوئے آج ایک پریس کانفرنس میں کہا کہ فیسٹیول کی افتتاحی تقریب میں جموں وکشمیر یوٹی کے کمشنرسیکریٹری کلچر ڈاکٹر سید عابد رشید شاہ مہمان خصوصی ہوں گے جبکہ جموں و کشمیر اکیڈمی آف آرٹ، کلچر اینڈ لینگویجز کے سکریٹری ‘بھرت سنگھ منہاس اور بشیر دادا مہمانان خصوصی ہوں گے۔
اس موقع پر افتتاحی خطاب این ایس ڈی سوسائٹی کے چیئر پرسن ‘پریش راول کریں گے اور اس کی صدارت این ایس ڈی کے ڈائرکٹر ‘چترنجن ترپاٹھی کریں گے۔ ایم امین بٹ‘ نثار نسیم‘ مشتاق علی احمد خان‘ عیاش عارف بھی اس تقریب میں شرکت کریں گے۔
افتتاحی تقریب میں اسماعیل چنارا کا تحریر کردہ اور بھارتی تھیٹر کی معروف شخصیت پدم شری پروفیسر رام گوپال بجاج کی ہدایت کاری میں بننے والا ڈرامہ ’’لیلیٰ مجنون‘‘ پیش کیا جائے گا۔
فیسٹیول کے دوران مختلف ڈرامے پیش کیے جائیں گے جن میں آصف علی کی تحریر کردہ اور بھارتی شرما کی ہدایت کاری میں بننے والا ’خوب لاڈی مردانی سبھدرا کی زبانی‘، وجے دان دیتھا کی کہانی دھوویدھا پر مبنی اور اجے کمار کی ہدایت کاری میں بننے والا میوزیکل ڈرامہ ’مائی ری میں کیسے کہوں‘، دھرم ویر بھارتی کی تحریر کردہ اور پدم شری پروفیسر رام گوپال بجاج کی ہدایت کاری میں بننے والی ’اندھا یوگ‘ اور اجے شکلا کی تحریر کردہ اور چتارنجن ترپاٹھی کی ہدایت کاری میں بننے والا ’تاج محل کا ٹینڈر‘ شامل ہیں۔
راجیش سنگھ نے عوام پر زور دیا کہ وہ اس تہوار کو ایک منفرد اور یادگار موقع کے طور پر لیں اور۶سے ۱۰نومبر تک فیسٹیول میں شرکت کو یقینی بنائیں۔ یہ ڈرامے روزانہ سہ پہر تین بجے ٹیگور ہال سرینگر میں پیش کیے جائیں گے اور پہلے آؤ پہلے دیکھو کی بنیاد پر ان کاداخلہ مفت ہوگا۔