بزرگوں کی دیکھ بھال، انہیں سماجی تحفظ فراہم کرنا ہماری قدیم روایت ہے

سرینگر//
لیفٹیننٹ گورنر‘منوج سنہا نے آج سرینگر میں پنشنرز سمیلن کا افتتاح کیا اور پنشن سے فائدہ اٹھانے والوں سے بات چیت کی۔
اپنے خطاب میں، لیفٹیننٹ گورنر نے تمام بزرگ شہریوں کا شکریہ ادا کیا، جنہوں نے پروگرام میں شرکت کی۔ بزرگوں کا احسان ہمیشہ انمول ہوتا ہے۔ انہوں نے کہا کہ جموں و کشمیر انتظامیہ یقینی بنائے گی کہ پنشنر ایک خوش اور صحت مند زندگی گزاریں گے۔
سنہا کاکہنا تھا’’یہ ہماری قدیم روایت، تہذیبی فرض اوراقدارہیں کہ ہم بوڑھوں کی دیکھ بھال کریں، انہیں سماجی تحفظ فراہم کریں اور کمزور طبقوں کو ہر طرح کی مدد فراہم کریں۔ یہ جموں و کشمیر انتظامیہ کی اولین ترجیح ہے کہ وہ یونیورسل کوریج فراہم کرے اور اس بات کو یقینی بنائے کہ استفادہ کنندگان کے ساتھ احترام کے ساتھ برتاؤ کیا جائے‘‘۔
لیفٹیننٹ گورنر نے انٹیگریٹڈ سوشل سیکورٹی اسکیم کے تحت۱۰۰فیصد سیچوریشن حاصل کرنے اور مستفیدین میں ستمبر کے مہینے تک پنشن کی تقسیم کے لیے ضلع انتظامیہ سری نگر کی پوری ٹیم کی ستائش کی۔
سنہانے کہا کہ انتظامیہ تمام ضرورت مندوں تک پہنچنے کیلئے پرعزم ہے، اور انٹیگریٹڈ سوشل سکیورٹی اسکیم بغیر کسی پابندی کے مانگ پر مبنی اسکیم ہے۔ انہوں نے مزید کہا کہ سرینگر میں۴۴ہزار سے زائد بوڑھوں، بیواؤں اور طلاق یافتہ افراد کا احاطہ کیا گیا ہے اور اگر ضرورت پڑی تو فوائد میں مزید اضافہ کیا جائے گا۔
لیفٹیننٹ گورنر نے کہا نے یو ٹی بھر کے ضلعی عہدیداروں کو تلقین کہ وہ سری نگر ضلع انتظامیہ کے بہترین طریقوں کو نقل کریں اور سماجی تحفظ کی اسکیموں کو تیز تر کرنے کے لئے ضروری تکنیکی مداخلت کریں۔
سنہا نے کہا کہ قطار میں آخری آدمی تک موثر سماجی تحفظ کا جال معاشرے کو مضبوط کرے گا اور شہری غریبوں اور بے سہارا لوگوں کے حالات زندگی کو بہتر بنائے گا۔
پنشنرز سمیلن میں، لیفٹیننٹ گورنر نے بیوہ اور طلاق یافتہ پنشنرز اور معذور افراد کو خود روزگار کے منصوبوں میں انتظامیہ کی طرف سے تمام ضروری تعاون اور مدد کا یقین دلایا۔
سنہا نے یونیورسل ہیلتھ انشورنس کوریج کو بڑھانے اور سب کے لیے زیادہ سے زیادہ تحفظ اور معیاری زندگی کو یقینی بنانے میں یو ٹی حکومت کی کوششوں پر بھی روشنی ڈالی۔
جموں کشمیر ملک کا واحد خطہ ہے جہاں بیوہ پنشن کے لیے اہل عمر۱۸ سال ہے۔ ایل جی نے کہا کہ انتظامیہ نے مینٹیننس اینڈ ویلفیئر آف پیرنٹس اینڈ سینئر سٹیزنز ایکٹ کے قوانین کو نوٹیفائی کیا ہے اور ان کی مناسب دیکھ بھال کے لیے ایک ہیلپ لائن بھی قائم کی ہے۔
لیفٹیننٹ گورنر کاکہنا تھا’’آج جموں کشمیر میں پنچایتوں میں سینئر سٹیزن کلب ہیں۔اس کے علاوہ ۱۳ ؍اضلاع میں سینئر سٹیزن ہومز قائم کیے گئے ہیں اور باقی اضلاع کو اس سال کور کیا جائے گا‘‘۔
سنہا نے استفادہ کنندگان کو منظوری کے خطوط اور طبی امدادیں حوالے کیں اور سماجی بہبود کی دیگر مختلف اسکیموں کے تحت بغیر کسی رکاوٹ کے فوائد تک رسائی کے بارے میں بھی دریافت کیا۔
فائدہ اٹھانے والوں نے سماجی تحفظ کی اسکیموں کے تحت فوائد کی توسیع کے آسان طریقہ کار پر اپنے خیالات کا اظہار کیا۔